Sam sanad ka JHADC ia ki Rangbah Shnong ka Jaintia Hills

Jowai, 24 Jylliew:
Ka JHADC mynta ka sngi ka la sam Sanad sha ki 108 ngut ki Rangbah Shnong ha ka jingialang kaba shongkun kaba la pynlong ha District Library Auditorium, Mynthong Jowai.
Ha katei ka jing ialang ki la don palat 500 ngut eiei ki Rangbah Shnong bad kiba la wan ban synrang lang ia ki nalor ki kynrem ki lyndang kiba kynthup ia u ma Sniawbhalang Dhar, Myntri ka tnad PWD, u ma Justine Dkhar MLA ka Khliehriat bad u ma Stephanson Mukhim MLA ka Amlarem nalor u CEM ka JHADC, ma Thombor Shiwat, u Dy. CEM, AA Shullai, JHADC Chairman u ma Arborhima Darnei nalor kiwei kiwei ki EM bad ki MDC.
Ki heh nongialam ka Synjuk ki Rangbah Shnong kynthup ia u ma Army Lypon bad u ma Pdianghun Dkhar Secretary haba kren ha ka jingialang ki la ai ka jingiaroh ia ka EC hapoh ka jingialam u ma Thombor Shiwat kaba la lah ban wanrah ia ka ain kaba pynkupbor ia ki Rangbah Shnong hapoh ka rilum Jaintia.
Ha ka juh ka por na ka liang u kongsan, u ma Sniawbhalang Dhar u la ai ka jingiaroh ia ki Rangbah Shnong kiba la ai ia ka jingiatreilang bad ka JHADC bad ka Sorkar Jylla haduh ba ka jingwanrah ia ka ain ban pynkupbor ia ki nongsynshar shnong, nongsynshar Elaka ka la long kaba jop.
Ha kane ka sngi, la donruh ki heh nongialam ka Synjuk ki Rangbah Shnong ka Bri U Hynniewtrep, u Dr. W Kharshiiing nalor kiwei kiwei kiba la wan ban ia synranglang ia u.
Haba kren ha ka jingialang na ka liang u CEM ka JHADC u la ong ba baroh kito kibym shym la ioh pdiang ia ka Sanad mynta ka sngi, kin wanmih sha Ophis ka JHADC. U la ong ruh ba ki don ki shnong kibym pat lah ban pynbeit namar ki don ki kynrum ki kynram lane kibym lah ban pynbiang ia ki jingdonkam katkum ka Act, ka JHADC kan sa bishar ia ki bad kan sa shim ia ka rai ban ai ne kyntait ban ai Sanad.