Sam marbam ka FKJGP sha ki nongialam Ri Bhoi Sepngi, ban iarap ia kiba duk

Nongpoh:Ki nongialam ka FKJGP ha Ri Bhoi, myn hynnin ka sngi, ki la leit ban aiti ia ki marbam mardih sha ki nongialam ka FKJGP Western Zone, khnang ba kitei ki nongialam ka Western Zone kin ioh ban iarap ia kito ki longiing kiba duk bad kiba la shem jynjar eh ha kaba kum kane ka por ba ki paidbah bad khamtam kito ki briew na ki longiing baduk ki kynduh jingeh.

Ha katei ka sngi, u Bah Luistar Lyngdoh, President ka FKJGP ha Ri Bhoi, u la leit ban aiti ia kitei ki marbam sha u Bah Centerwell Doloi, President FKJGP, Western Zone, khnang ba un lah ban aiti sha ki nongialam ka Circle bad Unit, na ka bynta ban sam sha kito ki longiing kiba donkam hok ban ioh ia ka jingiarap.

Haba iadei bad katei ka jingleit sam ia kitei ki marbam sha ki nongialam ka FKJGP Western Zone, u la kyntu ia ki nongialam kiba peit ia katei ka thain, ba kin peit bha bad ba kin leit iarap khnang na bynta kito ki longiing kiba la mad shisha ia ka jingeh, ha kaba kum kane ka por ba baroh ki dang iakhun ia ka khlam COVID-19.