Sam laptop ia ki samla pule

Shillong 21, K’lyngkot:
Ka sorkar jylla lyngba ka tnad Information Technology hynne ka sngi ka la pynkup burom ia ki samla pule ba wan shakhmat ha ka klas X bad XII 2015 da ka laptop jong ka MBOSE, ICSE, ISC bad Class XII ka CBSE ha Yojana Bhavan, Shillong.
Ia kine ki samla la pynkup burom da u myntri ka tnad IT u Bah A L Hek ba la don lang u Chief Secretary, Bah  P Barkos O Warjri bad  u Commissioner & Secretary ka IT, Bah Donald P Wahlang bad kiwei ki heh sorkar.
Ha ka jingkren jongu, u Bah Hek  u la ong ba ka long ka jingsarong ia ki kmie ki kpa ban iohi ba ki khun jongki kin tyngshain ha ka jingpule bad ka jingsam laptop ka dei kawei ka lynti ba ka sorkar ka la ai mynsiem ia ki na ka bynta ka jingtrei shitom jongki.
U la kyntu ia ki samla pule ban trei smat ban iai kiew ha ka jingpule ban long briew ha ka jingim jongki khnang ba kin lah ban noh synniang sha ka ri bad ka imlang sahlang.
Katba u Bah Warjri u la ong ba ka jingsam laptop ka dei ka atiar ba kin lah ban pyndonkam na ka bynta ka jingmyntoi jong ki ha ka jingpule.
Katba u Bah Wahlang ha ka jingkren jongu u la kdew ia ka jingthmu jong ka jingsam laptop sha ki samla na ka bynta ka jingmyntoi jongki ha ki sngi ban wan ha ka jingim jongki.