Sam jingri ha Mawpyrshong

Shillong,31 Naitung:
Ka Indian Council of Agricultural Research (ICAR), Umiam, ha ryng kat ka jingiatreilang bad ka Inner Wheel Club Of Shillong kumjuh ruh ka Meghalaya Youth Foundation ka la pynlong ia ka jingsam symbai jingri sha ki nongri jingri bad ki nongrep jong ka shnong Mawpyrshong mynhynnin ka sngi ka 30 tarik u Naitung naduh a por 11:00 baje mynstep.
Ha katei ka sngi ba la sam ia ki symbai jingri sha ki nongrep la ia donlang ruh ki stad saiantis ka ICAR kiba kynthup ia Dr. Samar Hazarika Senior Scientist Soil Division; Dr. G. Kadirvel, Senior Scientist of Animal Production; Dr. K.P. Mohapatra, Senior Scientist of Forestry Division bad Dr. Ramkrushna G.I., Scientist of Agronomy Division. Kiwei pat kiba la ia donlang ha katei ka jingialang plie ki long u President of Inner Wheel Club of Shillong, Smt. Chandana Das bad ka kynhun jong ka, U Chairman jong ka Meghalaya youth Foundation Joannes JTL Lamare, U Sordar jong ka shnong Mawpyrshong ki dskhot ka dorbar shnong ki nongshong shnong bad ki nongrep kiba ioh ia katei ka lad jingiarap.
Haba kren ha katei ka sngi, u Dr. Hazarika u la ong ba la pynlong ia katei ka prokram ha Mawpyrshong na ka project kaba hap hapoh ka Tribal Sub Plan kaba mut ban iarap ia ki nongrep ban pynkhambun ka jingpynmih jong kin a ka jingri bad ka jingrep. U la iathuh ruh ba bun na ki nongri jingri bad ki nongrep ki la ioh jingmyntoi shibun na ka lad jingiarap ba ka ICAR ka la pynioh ia ki ha kaba ki la ioh ruh ia shibun ki buit bad ki jingstad ha ka Ri jingri kaba lah ban pynmih ia ki jingdonkam jong ki. U la ban biang ia ki nongrep ba ki dei ban bud ia ki jingbthah jong ka ICAR lada ki kwah ba kam ri jingri jong ki kan long kum ka kamai bad ka kam jong ki namar ka jingbthah katkum ka jinglap jong katei ka tnad ka lap ba bun ki nongrep ki la kiew ha ki jingioh jingkot da kaba ki bud ia ki jinghikai jong ka ICAR.
U Dr. Kadirvel, u la iathuh ba ha u snem 2011 ki nongri jingri ki la lah ban kamai bha na ka kam ri sniang , u la bthah ruh ia ki nongri ba kin husiar bha na ki jingpang jong ki jingri jong ki ha kaba ki hap ban aid a ki dawai iada ia ki bad kumjuh ruh ka bam kaba biang.
U Joannes JTL Lamare, u la pyni ia ki paidbah ba ki dei ban shim ia kabu bad ki lad jingiarap ba ki ioh na ka ICAR namar kan ai jingmyntoi ia ki hi. U la ong ruh ba katei ka scheme ka dei ka scheme kaba wan na ka sorkar India na ka bynta ban iarap ia ki nongrep, u la ong ruh ba ka shnong ka long kaba donbok shibun ban ioh ia katei ka scheme.
Ha katei hi ka jingialang la sam ia ki jingri sha ki nongri jingri jong katei ka shnong, la sam ruh ia ki 300 tynrai dieng bad la thung ia kid a ki nongrep jong katei ka shnong , ki tynrai kiba kynthup ia u tynrai synsar bad kiwei.