Sam jain syaid, ki seng kynthei NPP sha ka jaka ri khunswet

Shillong:Ki dkhot kynthei jong ka National People’s Party (NPP) hynnin ka sngi, ki la leit jngoh ia ka jaka ri khunswet A.W. Thomas Girls’ Home ha Jaiaw Lumsyntiew, ha kaba ki la sam ia ki jain syaid sha ki 45 ngut ki khynnah rit, kiba ha ka rta kaba 6 haduh 18 snem ka rta.

Ha katei ka prokram, la don lang ka kong Jubinia Lymba, House Mother jong ka jaka ri khunswet, ka kong Camilia L Ryntathiang, Probationary Officer, AW Thomas Girls’ Home, ka kong P. Nongpluh, State Working President NPP Women’s Wing, ka kong M. Basaiawmoit, State Secretary, NPP Women’s Wing bad ka kong R Kurbah, State Secretary, NPP Women’s Wing, ha kaba la don lang ruh da U Bah Nickey Nongkhlaw, National Working President NPP Youth Front.

Ka kong C. Ryntathiang, Probationary Officer jong ka jaka ri khunswet, ka iathuh ba katei ka dei ka iing kaba don 60 ngut ki khynnah kiba sah bad katei ka iing, ka don ia shibun ki jinghikai naduh ka suh ka thain, ka shet ka tiew, ka tem ka put bad kiwei.

Lah ban pyn kynmaw, ba ki don ki khynnah bad ki nongtrei ha katei ka jaka ri khunswet, kiba la ioh pang Covid 19, ha U Naiwieng ba ladep, ha kaba ki khynnah, ki la ialeh pyrshah bad jop ia katei ka jingpang.