Sam electoral roll U DC sha ki seng sain pyrthei

Shillong, 15 Risaw:
U Deputy Commissioner ka East Khasi Hills mynta ka sngi Balang u la sam ia ka thup kyrteng jong ki nongthep ne ka electoral roll sha ki seng sain pyrthei ha ka jingialang kaba long ha Conference Room jong ka DC ophis ha Shillong.
Napdeng ki seng sain pyrthei kiba wan ban shim ki kynthup ia ka UDP, Congress bad ka NPP. Ha kane ka jingsam ia kane ka electoral roll, la pynlong ruh shi bynta ban pyntip bad kyrpad na ka liang ka ophis jong u DC sha ki seng sain pyrthei ba kin iarap ban pynsngewthuh ia ki paidbah ba kin wan shakhmat ban pynrung kyrteng kum ki nongthep vote.
Haba kren ha kane ka jingialang kaba lyngkot u Deputy Commissioner ka East Khasi Hills u Bah CVD Diengdoh u la ong ba ha ka por elekshon ka dur thep vote ka long kaba donkam palat. Hynrei ym tang ha ka por elekshon hynrei wat ha kiwei kiwei ki jingdonkam ruh, ka dur thep vote (EPIC) ka long kaba donkam bad namarkata, ki paidbah ki dei ban shon dur thep vote bad ban pyndonkam ruh ia ka hok kum ki nongthep vote kum ki nongshong shnong ka ri khnang ban pynkhlain ia ka riti synshar paidbah.
“ngi donkam ia ka jingiatreilang ki kynhun, ki dorbar shnong, ki seng sain pyrthei ban pynlong ia ka jingthmu kaba jop”, la ong u DC.
Haduh u Lber 2014, ka jingpynrung kyrteng ia ki nongthep vote ka la kot sha ka 4,48,767 ngut ha ka East Khasi Hills ba kynthiup 17 tylli ki constituency. Ka ophis u DC ka la pynlong ia ka jingpynrung kyrteng thymmai naduh mynta ka sngi ia kito ki nongshong shnong kiba don 18 snem shaneng ban rung kum ki nongthep vote.
Ha kane ka jingpynrung kyrteng, ki nongtrei kum ki Booth Level Officer ban iarap da ki Booth Level Agent kin leit sha man ki jaka thep vote ne ki polling station ban shim kyrteng ban pynrung kum ki nongthep vote. Na ka bynta kane, na ka liang ka ophis jong u DC ka la kyntu ia ki bor shnong, ki seng sain pyrthei bad ki paidbah ba kin ia leit ban shim ia kane ka lad.
Naduh une u mynta Risaw haduh u Naiwieng ban wan, ka jingpynrung kyrteng kan iaid bad kan don ruh ka jingpynlong ia ka jingbishar ia ka jingpynrung ia ki kyrteng da kaba pynlong ia ka jingbishar paidbah. Kiba kwah ban pynbeit kyrteng bad kiwei ki jingdonkam ki lah ban leit ha ki jaka thep vote ban wan da ki briew na ka ophis jong u DC election.Ha kane ka sngi, la don lang ruh u ADM u Bah Banri Mawlong, ki samla na ki kolej kiba la iateh bad ka ophis DC Shillong ba kin pynrung kyrteng ruh ha ki kolej ia ki samla pule.
Ban pynsted ban ialap paidbah ban tip bad sngewthuh ia kane, ka ophis u DC ka la pyntreikam ruh da ka Systematic Voters Education and Electoral Participation (SVEEP). Ka jingpynrung kyrteng kan sdang naduh 15 tarik Risaw haduh 10 tarik Naiwieng bad ka jingpdiang ia ka jingujor dei ban leh shwa ka 10 tarik Naiwieng 2014.