Sam baibam u Mukul sha 110 ngut ki samla pule

Shillong, 26 Risaw:
U Myntri Rangbah ka jylla u Dr Mukul M Sangma hynne ka sngi Balang u la sam baibam sha ki 110 ngut ki samla pule lyngba ka skhim Chief Minister’s Career Guidance & Counseling Scheme ha ka jingialang kaba long ha U Soso Tham auditorium, Shillong.
Haba kren ha kane ka jingialang, u Dr Mukul u la ong ba ka Chief Minister’s Career Guidance & Counseling Scheme, ka iaid sha lyndet u pud jong ka jinghikai, kaba thew ban saindur ia ki samla pule ban seng nongrim ialada na ka bynta ka lawei jongki.
U la ong ban weng ia ki jingeh jong ki samla, ka long lyngba ka jingwanrah da ki buit treikam thymmai ban pynkylla ia ka jinglong ban ai bor ia ki paidbah.
U Myntri Rangbah u la ong ba ka prokram kan plie lad ia ki samla ban tur shaphrang ia ka lynti iaid jongki da kaba btin lynti ia ka lynti iaid jongki ban jied ia ka kam kaba dei bad kaba myntoi ha ka jingim jongki.
U la iathuh ba ka jingthmu jong kane ka prokram ka long ban thaw dur ban pynlong ia ka, kaba larkam na ka bynta ki samla kaba long kum ka jubab ia ka jingangnud jongki bad ban pynpoi sha baroh ki bynta jong ka jylla. “La donkam ban ai ia ka jinghikai kaba biang ia ki samla ha ka pule puthi bad ha ka kam ka jam khnang ba kin lait na ka jingialam bakla”, la ong u Myntri Rangbah.
U la ong ba ka sorkar jylla ka la pyrshang ban pynbeit ia ki jingdkoh ha ka thungkam thungkam ha ki tnad namar ba ka la long kawei ka mat kaba la pynduh mynsiem ia ki briew ha kane ka jylla, khnang ban ai mynsiem biang ia ki.
“Haba pynbeit ia ka jingdkoh ka rukom thungkam ha ki tnad sorkar ban ai jingkyrmen khnang ban khang lad ia ka bamsap kaba la pynjngut ia ka jingmut jingpyrkhat jong ki samla”, u la ong.
U la kyntu ia ki samla ban shim kabu na kane ka skhim khnang ban sain dur ia ka lawei jongki ha ka lynti iaid kaban sa wan ha ki jingim jongki.
Shwa ia kane, la ioh ruh ia ka jingkren na u myntri tnad ialehkai ka jylla u Zenith M Sangma uba la ong ba kane ka skhim ka la ai jingmyntoi bha shibun ia ki samla ka jylla.
Ia ka Chief Minister’s Career Guidance & Counseling Scheme la pyntreikam ha u snem 2012 ban ai jinghikai ia ki samla pule kiba kwah ban ialeh ia ki kam Medical Entrance Exam, Engineering Entrance Exam, Banking Exams bad IAS.