Sakhi ki nongthaw ain bad ki babu sorkar ia ka jinglah ki riew anna

Shillong: Ka kynhun jong ka Intellectual Disability (ID) bad ka Multiple Disability (MD) kaba kynthup ia 6 ngut ki dkhot kaba na Meghalaya Parents Association for Disabled (MEPAD) ka la lah ban pyndep ia ka Shad Suk Mynsiem ha Balayogi Auditorium, Parliament House New Delhi ha ka jingleh tamasa tynrai kaba la ai kyrteng “Dibya Kala Shakti Witnessing Abilty in Disability” myn ha ka 23 tarik July 2019. Kiba la wan ban iashim bynta ha kane ka tamasa ki dei na ki jylla bapher bapher kumjuh ruh na ki Union Territory ka ri India.

U Sri Ram Nath Kobind u President ka ri India, Sri M. Venkaiah Naidu u Vice Presidnet ka ri India, Sri Narendra Modi Myntri Rangbahduh ka ri, Sri Om Birla u Speaker ka Lok Sabha ha ryngkat baroh ki nongmihkhmat sha ka Dorbar thaw ain ka Lok Sabha bad Rajya Sabha kumjuh ruh ki heh sorkar na ki Ministries bapher bapher lem bad ki nongialam jong ki heh sorkar ki la ioh ban sakhi ia kane ka tamasa. U Sri Kiren Rijiju u la long uba don lang napdeng ki MP’s na ka thain North East. Hadien kane la don sa ka jingiatyrko hapdeng jong ki bad ka jingiabam bad u President ka ri India ryngkat bad baroh ki nongiashim bynta myn ha ka 24 tarik July 2019.
Kane ka dei ka sien ba ar ka ba la pynlong ia kum kane ka program ba la pynbit pynbiang da ka Smti Shakuntala Dally Gamlin, IAS, Secretary MSJE haoph ka jingialam u Dr. Thaawarchand Gehlot, u Minister ka Social Justice & Empowerment, kum ka lad ban phah khubor sha baroh ki nongthaw ain bad ki heh sorkar ka ri India kata kumno ban pynlong ia ki Divyanjgan kiba don ia ki jinglong ki ban pynshong nongrim ha ki rukom bishar ia kaba dei bad bym dei, ka jingnangsan ha kiba bun ki liang, ka jingbym don shuh ka jingsngewiapher iwei na iwei, ka jingialong kawei ha ka jingiashim bynta bad ka jingithuh ia ki jingpyrshang jong ki kmie ki kpa, ki nonghikai bad ki nongsumar. Ka program ba nyngkong jong ka ‘Dibya Kala Shakti’ la pynlong da ka MSJE ha Rastrapati Bhavan ha ka 18 tarik u April 2019, ha kaba u President u la pyntip sha baroh ki jylla, Union Territories, kumjuh sha baroh ki Districts bad haduh ki Block bapher bapher ban pynlong ia kum kane ka program ha la ki jong ki jong ki jaka da ki kyntien kyntu na u President “Ban pynlong ia kaba dei kaba shisha” ia ki Dibyanjgan.