Sahteng ka surok Jakhong ba ieh u kontraktor, ong u Metbah

Shillong: Ka jingsahteng ka surok ban siang rong na Mawkarah sha Jakhong, ka dei namar ba shu ieh u kontraktor ba la ai ban pyntrei.
Ia kane la ong u MLA ka thain uba long ruh u myntri sorkar jylla, u bah Metbah Lyngdoh haba kren mynta ka sngi sha ki lad pathai khubor.
Kane ka jingkren u bah Metbah ka dei namar ba ki longkmie kane ka shnong kila mih paidbah ban moramot ia ka surok kaba jrong 5 KM la sniew palat.
“Ka dei ka surok ba 5Km kaba pyntrei na ka skhim PMGSY. La dep aiti ia ka kam ha uwei u kontraktor naduh mynshem snem hynrei haduh mynta u klem pyntrei”, la ong u bah Metbah.
U la iathuh ba wat hadien ba ka tnad PWD ka la dep ai jingthoh bunsien sha u kontraktor hynrei um shym la jubab satia bad mynshem bnai, la weng noh syndon ia u bad la ai dak iong syndon.
“Mynta ngi la khot noh da ka tender kaba thymmai”, la ong u bah Metbah.
U la iathuh ba ka jingshisha, u la mut ban pynrung ha ka jingmang tyngka naduh u snem 2008 hynrei ka don jigneh namar ba 10 km la shna ka skhim ka sorkar jylla katba 5Km la shna na ka PMGSY.