Sahkut lut sa ki eksamin DSC, namar ka roster, ong U Bah Renikton

Shillong:U MLA ka Mawkyrwat u bah Renikton L Tongkhar mynta ka sngi, ula wanrah ia ka mat hapoh ka ing dorbar thawain halor ka jingpynslem ki district selection committee (DSC) ban khot pynlong ia ka eksamin thungkam.

Haba wanrah ia kane, u bah Renikton ula ong ba ki ophisar ki ai daw ba slem ban pynlong ia ka DSC examin dei namar ba don ka Roster system. U la ong ba baroh ki tnad sorkar ki la hap ban buh ia ka bui Roster Register bad kin phah sha ka Directorate ban phah sha ka sorkar jylla. Kane ka la bam por bad ka pynduh lad ia ki samla bad baroh ki tnad ki leh ia kane bad ka jingslem kam long shuh kaba kai namar tang ban iaid ka file na uwei u ophisar sha uwei ka shim por bun.

Ka don ruh ka jingkulmar ki ophisar ha ki district halor ka Roster system, kaba 80 percent ia ki Khasi-Jaintia bad Garo ha ki district. “Ki ophisar ha ki district ki kulmar, la kin bud ia ka 40/40 ne ia ka 80 percent combine reservation kumba la kdew ha ka office memorandum (OM) 1972 ia ki Khasi-Jaintia bad Garo khamtam ha ki district ba duna kiwei ki jait bynriew Khasi-Jaintia ne Garo”, la ong u bah Renikton.

“Kane ka 80 percent combine reservation ka lah ban treikam tang ha ki district bym don kiwei pat ki jaitbynriew, hynrei kan eh haba don kiwei tangba ki duna ia ka percent kumba la buh”, la ong u bah Renikton. Kane ka mut ba ha jaka ba don tang ki Khasi-Jaintia ne kaba don tang ki Garo ka lah ban long hynrei lada don ki jaka ba bun ki Khasi-Jaintia hynrei don khyndiat ki Garo kan eh ban pyntreikam ia ka bhah 40-40 percent.

U la ong ba katkum ka OM kaba pynmih ha u jylliew 2023, ka la batai ia ka jingpynrung kam ia ki Khasi-Jaintia bad Garo kaba long 80 percent, hynrei kane ka la wanrah jingkulmar namar ba don ki district ba duna ki Khasi bad don kiba duna Garo bad ula ai jingmut ba ka la donkam ban pynbeit shwa ba kan nang rben ka jyrwit jyrwat.
Ha kajuh ka por ula ai jingmut ba ka jingmang bhah kam 80 percent, dei ban bteng ia ki Khasi-Jaintia bad Garo, bad dei ban pynkylla noh ia ka Office Memorandum ban ailad ia ki DSC ban shim jingkhein ia baroh ki tnad sorkar ba lait kam ha jaka ban iaid sha personal department.