Sahkut ki kali sha Wahlakhiat, ba sniew ka surok

Shillong, 26 Jylliew:
Ka surok PMGSY Wahlakhiat ha ka jing pynjulor ka mariang naduh ka 3 tarik Jylliew, 2015 ka la duh bad kylla long Mawjynthut ia ka leit ka wan u paidbah nong shong shnong ha ka liang ka kit ka bah bad ruh ia ki marbam mardih bad ruh kiba pang ba shitom.
Ha ka jingpynlait khubor, u Rangbah Shnong Wahlakhiat u Bah J Ryndong u la ong ba kane ka jingshah pynjulor ka mariang, ka la buh jingeh ia ki kali ban iaid haduh ba don kiba dang sahkut ha shnong.
U Rangbah Shnong u la ong ba la dep iakren ia u MLA ka thain u Bah Remington Pyngrope bad ia ki bor ba dei peit hynrei haduh mynta ka surok kam pat don satia ba shna.
U la ong ba u kontraktor ba pyntrei ia katei ka surok u la ai daw ba jur palat u slap ym long ba trei. Ha ka jingshisha u slap ba wan ha kine ki sngi um dei satia uba ther hynrei tang u lap praw ba mulu mala uba wan teng shiteng kynta eiei kum u lap jingkyrkhu, la ong u Bah Rangbah Shnong.
Halor kane ka jingsniew ka surok, ka Balang Presbyterian ha ka 22 tarik Jylliew, 2015 ka la noh synniang da ka jingtrei mon sngewbha kum shi bynta ban iatynrong lem ia katei ka jingeh kaba ki paidbah nongshong shnong ki la iakynduh, la ong u Bah Ryndong.
Da kane ka jingpynmih khubor, u Rangbah Shnong u la kyrpad ia ki bor ba dei peit ba kin shim khia ban pynshna noh ia katei ka surok khnang ba ki paidbah kin lait na ka jingeh.