“Sahkut ka Medical College, bym pat kynriah ka TB hospital”

Shillong, 24 Lber:
U myntri ka koit ka khiah ka jylla u Bah AL Hek u la ong ba ka jingtei ia ka Shillong Medical College ka dang sahkut namar ba  ym pat lah ban pynkynriah ia ka TB Hospital na ka jaka kaba don mynta.
Haba jubab ia ka jingkylli ba la wanrah da u Dr Donkupar Roy mynta ka sngi Hatmajai hapoh ka iing dorbar, u Bah Hek u la ong ba ka sorkar ka la dep iasoi ia ka jingiateh bad ka KPC Medical College and Hospital, Jadavpur ha ka 19 tarik Risaw, 2012 bad ka jingiakut la iasoi ha ka 2 tarik Naiwieng, 2012 ban shna ia kane ka Medical College ha Shillong lyng ba ka Public Private Partnership (PPP). Ia kane ka Shillong Medical College yn shna ha Mawprem ba don ha TB Hospital kaban rah noh sha Mawdiangdiang.
U la ong ba ka kam ban shna ia ka TB hospital sha Umsawli, Mawdiangdiang ka la iaid shaid shaid bad mar ia dep, yn rah noh shatei ka jaka khnang ban lah ban sdang noh ia ka jingtrei jong ka Shillong Medical College ha katei ka jaka.
Katba ia ka Tura Medical College kaban shna da ka sorkar, la iasoi bad ka Telecommunication Consultant India Limited (TCIL) ba kan pynkhreh ia ka Detailed Project Report (DPR). La iasoi ha ka 23 tarik Nohprah, 2014 bad kane ka kompeni ka la khreh shaid ban shna ia ka DPR.