Sahkut ka jingsiang surok 12shnong

Shillong, 18 Lber:
U Myntri ka tnad PWD u Bah Sniawbhalang Dhar u la ong ba ka surok na Mawjrong sha Khadar shnong, ka sahkut khlem lah ban pynsiang rong dei namar bym pat don pisa ka sorkar.
Haba jubab ia ka jingkylli ba la wanrah da u Bah Titosster Well Chyne mynta ka sngi, hapoh ka iing dorbar, u Bah Dhar u la ong ba haduh mynta ia kane ka surok, la siang rong tang 17 km na ka 25 km. “Ia ka bynta kaba sah, dang sah teng bad ka tnad kam pat leh eiei namar ba kam don pisa hynrei lada ka don pisa kan sa peit ia kane”, la ong u Bah Dhar.
Na ka liang u MLA ka Sohra u la kyntu ia u myntri ba un shim khia ban pynmang pisa na ka tnad ban siang rong noh ia kane ka surok kaba la slem khlem pat ioh rong.