Sahkut ban thaw kynhun iada mariang

Shillong, 4 Nohprah:
Ka jingthmu ban thaw ia ka kynhun iada mariang ne ka Meghalaya Ecological Battalion ka la don slem hynrei kane ka
jingthmu ka dang sahkut ha suin bad ia kane la pynsngew ha ka jing ialang kaba 19 jong ka Rajya Sainik Board ha kane ka sngi Palei.
Haba kren sha ki nongthoh khubor hadien ba la wai ka jingialang, u
director ka Rajya Sainik Board u Brigadier (Retd) WJB Sturgeon u la
ong ba ka sorkar Meghalaya ka dei kaba nyngjong ban thmu seng ia kane
ka kynhun iada mariang kaban don 3 ngut ki ophisar, 5 ngut ki JCO bad
139 ki langrut.
Kane ka kynhun iada mariang yn tip kum ka ‘’Ecology Battalion’’ ha
kaba ka kam jongka ka long ban peit ia ka mariang ha baroh kawei ka
jylla ban ai ia ka jingialap ban pynsngewthuh ia ki paidbah halor ka
jingiada ia ka mariang.
Ha kane ka jingialang, la iakren ruh ia ki mat kiba iadei bad ka koit
ka khiah bad ban pynkhlain ia kane ka kynhun iada sha ka 1500 ngut.
Ha kane ka kynhun iada mariang, kan kynthup ia ki pulit na ka jylla,
ki shipai kynthuo ki shipai suin, bad kiwei ki kynhun.
Ka Rajya Sainik Board ka Meghalaya, ka de ka met kaba ha khlieh ban
thaw ia ki polisi bad ban pynbna ia ki rai.
U WJB Sturgeon u la iathuh ba ka sorkar ka la pdiang ia ka jingthmu
ban plie ia ki skul Sainik ha Garobadha hajan Tura bad 50 akar ka jaka
la ioh na ka bynta kane ka jingthmu ha ka jingmang ban pynlut kaba T.
80 bad yn bei da ka sorkar jylla.
Shuh shuh ka sorkar ka la pdiang ban tei ia ka Sainik Rest House ha
Shillong bad ha Tura bad ban thaw shuh sa san tylli ki Welfare
Organizers Posts ha Nongpoh, Baghmara, Williamnagar, Nongstoin bad ha
Jowai.