Sahkut 50ngut ki dkhot ka HYC, ha jaka ieng bos ha Polo

Shillong, 21 Nailar:
Shi sngi shuwa ba ka Hyniewtrep Youth Council ( HYC) kan leit ban shong kyllain mongor ha khmat iingsah u myntri rangbah ka jylla u Dr.Mukul Sangma, ki bor Distrik ki la pynjari da ka section 144CrPC kaba la khang pyrshah ban ia iaid kynhun lane ban ia lum lymbrum 500 mitar tawiar ka iing u myntri rangbah.
Ka HYC ka la buh por 1 baje mynsngi ban leit shong kyrain ha khmat ing u Dr.Mukul hynrei la iohi ba naduh ka por 11 baje mynstep shriak la pynap da ki pulit ha manla ki lad ki lynti ban leit sha iing u myntri rangbah ha kaba la iohi ba baroh tawiar ki jaka naduh na Polo, na ka lynti ban wan na Khyndailad, na Nan Polok la rben da ki pulit bad ki CRPF.
Shuwa ka 1 baje mynstep kumba 50 ngut eiei ki nongialam bad ki dkhot ka HYC ki la don ha Parking Lot Polo ha ki dukan sha ban ap ia ki paralok jong ki ban ia mih na katei ka jaka ban leit ha khmat ing u Dr.Mukul Sangma, hynrei ki pulit ki la ioh jingtip noh, ia ka jingdon ki dkhot katei ka seng ha katei ka jaka bad kumta sa tang shiphang ar phang ki pulit ki la poi sha katei ka jaka bad ki la ker kut sbak tawiar ia katei ka jaka ba ki dkhot ka HYC kin ym lait ban mih.
Shipor la iohi ba ki dkhot katei ka seng kiba don ryngkat bad ki nongialam jong ka ba kynthup ia u President u bah Peter J Lawai, bah Robert Kharjahrin General Secretary, u bah Donbok Kharlyngdoh, u bah Nickson Dohling bad kiwei ki la sei la ki pla kad bad ki la khreh ban mih na katei ka jaka ban tur beit sha iing jong u myntri rangbah. Hynrei ki bor District lyngba ka Majistor ka la wan ban ia kren bad ki ban pyntip ba la pynjari da ka section 144CrPC bad kim lah ban tur jubor.
Hadien ka jingiakren kaba la neh katto katne por ka Majistor ka la ailad ia ka HYC ba kin ia khih da kaba shong kyllain mongor jai jai ha katei hi ka jaka ha Parking Lot Polo, hynrei ki nongialam katei ka seng ki la ong ba lada lah ban shah ia ki ha Parking Lot polo ka jaka ka bym hap shuh ha ka section 144CrPC ki bor Distrik ki dei ban shah ia ki ban leit shong ha khmat Secretariat namar ba katei ka jaka ruh kam hap shuh ha u pud jong ka 144CrPC.
Hynrei tdot na ka liang ki bor Distrik kim shym la ailad ia ki ban mih na katei ka jaka, kumta ki dkhot katei ka seng ki la pyni ia ka jingpyrshah jong ki da kaba rah da kip la kad jong ki bad ka jingiapyrta kaba ki la pynrem ia ka sorkar u Dr.Mukul Sangma bad kumjuh ruh ia u bah Rowell Lyngdoh, symbud myntri rangbah bad kumjuh ruh ki la pyrta ba ka sorkar ka dei ban weng ia ka Ordinance. Ha katei ka jaka ieng night Super ki nongialam katei ka seng ki la thang ruh ia ka jingthoh ba ka Majistor ka la wan ai ha ki hadien ba ka la dep ban pule ban pyni ba la pynjari da ka section 144CrPC ban tur sha iing sah u Dr.Mukul Sangma myntri rangbah ka jylla.
Shuwa ban thang ia katei ka jingthoh jong ka section 144CrPC, u bah Robert june Kharjahrin bad u bah Peter J Lawai, ki nongialam katei ka seng ki la pynsngew da kaba kren tynghung ha katei ka jaka ba hadien kin sa sa leit ban tur sha Secretariat da kaba ia iaid rally paidbah naduh na ophis katei ka seng na Mawlai bad ia ka tarik ki la ong ba kin sa pynbna pat hadien.