Bah Monarch Shabong
Ki shnong khappud bad ka Bangladesh, ki sahdien shi katdei eh bad ha kine khyndiat sngi, la iohi, ba ki hap ban ia trei hi, ia ki surok kiba dap da ka ktieh ahor, namar ban kham pynsuk ia la ka jong ka iaid ka ieng, ka leit ka wan. Hynrei, kam dei tang ki shnong khappud, la iohi dang shen, ba kiba bun ki shnong ha Ribhoi, ba ki hap ban ia trei surok dalade hi, namar ka jing julor, ka la palat liam bad kaba sngew jnang ban pyrkhat ba ka PWD haduh mynta, kam pynmih tang shi kyntien, ka jing ai khublei ia ki riew paidbah, haba ki la shim ia ka bynta jongka.
La ju tip ha ki phew snem mynshwa, ba ki shnong khappud, ki dei ki shnong kiba la roi shi katdei eh bad katei ka dei lyngba ka jing iadei jongki bad ka Bang ladesh, ha kaba u khaw, u jhur, ka bam ka dih byllai, ba lah ban ioh na ki iew khappud; hynrei ha kine ki sngi, hadien ka jing ia phiah jong ka India bad ka Bangladesh, ngi iohi, ba kiei kiei, ki la nang poi shaba sniew bad ha kine ki sngi, ki iew khappud, ki la iap bad ka daw, ka long na ka jingkhanglad jong ki ar tylli ki Ri, ia kato ka rukom, kaba la ju leh baroh shi katta bad lah ruh ban ong, ba ka iew ia die khutia hapdeng ki ar tylli ki Ri, ka la duh, katba ka iew khaii ki heh spah, ka la nang kiew bad khamtam ka khaii tuh, ka la nang kiew stet shibun.
Ha ki phew snem mynshwa, ki don shibun ki jingiarap, ia ki nongshong khappud, ha ka dur jong ki skhim bapher ka sorkar India, lada dei ia ka scholarship, ka bai kot, ka bai skul, ki skhim shna iing shna sem, ki skhim shna lynti syngkien bad bun bah sa kiwei pat ki lad jingiarap, hynrei ha kine ki sngi, kine ki la shu long tang ki nongmuna ban nym pynjah kyrteng, katba ka jing iarap, ka la nang hiar, ka la nang duna.
Ka thain khappud, haduh mynta, kam don ia ki ksiang jongka, ki ban iakren bad ka sorkar India, na bynta ka roi ka par bad ka eh ka shon jong u paidlang, uba don sha khappud bad ka Bangladesh bad dei na kata ka daw, ba mynta ka la duh shuh sa shibun bah ki jaka, ha ka kyrteng jong ka jingker sainar shiah bad kam dei tang katta, hynrei ka jingtlot ka sorkar Jylla lane ki nong mihkhmat na khappud, ki la ai laitlan ia ki shipai BSF, ba kin ioh sam dalade ia ki skhim ba har rukom, ha kaba ka jingkhlain bor jongki, ka la long hi mar ryngkat ne kham palat toi ia ki MLA ne ki myntri sorkar.
Ki nongshong khappud, lada ki kwah ban ioh ia la ki jong ki bhah, ki dei ban tih tyllong sha Delhi, ia ki skhim border area bad hangta, kin sa bud dien ban ioh ia la ki jong ki bhah.
Phi don ban ong eiei?