Shillong:Ki nongrep kiba wan na kylleng ban kit jhur, ban die lang ha Anjalee parking lot myn hynnin mynstep, ki la shu sah ha ka umdum, namar ka ynda ki la poi ha Anjalee petrol pump, ym shym la shah ba kin rung sha Anjalee parking lot.
Kane ka jingbym shah ban rung ia ki nongrep sha Anjalee parking lot ka la buh ia ki nongrep ha ka lyng ngoh,ha kaba ki kali kiba wan kit jhur na kylleng, kum na ki thain Smit, Shiliang um Diengiei, Ri Bhoi District bad na ki thain Mylliem ki la hap ban pynieng ia ki kali ha jan Rhino bad pyrshah Arunachal Bhavan.
La iathuh ba bun na ki nongrep ki la pynpaw ba kane ka jingleh na ki bor sorkar ka buh ia ki ha ka jingeh namar kane ka jingpynkynriah jaka ne na kino ma ki daw, ka la pyndik khamtam ia ki nongrep ki ba wanrah ia u jhur u ba dei u mar pyut.
Ha kine ki sngi ka jingpyniaid iew die lang ia u jhur ka long ha Anjalee parking lot, ba wat ki kali ba wan kit jhur na Assam ruh ki wan ha katei ka jaka, hynrei mynta ka sngi ka la pyn lyngngoh ia ki nongrep kalong ba ym shem la shah ban rung sha Anjalee Parking lot wat haduh ka por 8.20 baje mynstep.
Bun na ki nongrep ki la iathuh ba ki la mih na la shnong dang dum ban poi sha kane ka jaka kumba juh long man ka sngi, hynrei mynta ka sngi ki la hap ban ia die ia ki jhur ha Rhino namar bym shah ban rung sha Anjalee parking lot.
Na ka liang ki nongrep ki la iathuh ruh, ba ka sorkar ka la rai ban pynlong ia ka Iew Mawlong parking lot kum ka jaka dielang ia u jhur, ha ka mala ka ba nyngkong bad hapoh; hynrei hangne ruh kam shem la long kumba la rai da ka sorkar mynta ka sngi.
Phi don ban ong eiei?