Sah umdum ki nongpang, bym iaid shuh ka MHIS ha hospital

Shillong, 4 ’lyngkot:
Ki nongpang ki la sah ha ka umdum mynta namar ba ka card ka Megha Health Insurance Scheme (MHIS) kaba sam ka sorkar kam iaid kam shuh ha ki jaka sumar. Haba pyrshang ban wad jingtip halor kane na tnad MHIS, la iathuh ba ka sorkar jylla ka la pynkut ia ka jingtreikam iaka MHIS card naduh u bnai Risaw ha kaba kim lah ban pynthymmai biang bad baroh ki card kim iaid kam shuh namar ba ka sorkar ka dang thmu ban pynthymmai haduh u bnai Lber ban wan.
Haba kylli kaei ka ban jia ia kito ki nongpang ba leit thiah pang mynta, ka jubab ka long ba kim lah leh eiei namar ba ka sorkar ka la pynbna ba ka card ka la iap bad kam iaid kam shuh bad kiba thiah pang ki hap ban sei katba lut na la pla lajong.
Ka card ruh kim lah shuh ban pynthymmai hynrei kin hap ban ap haduh ban wan hi ki nongtrei na ka MHIS ban pynthymmai ban pyntreikam ia kata ka Phase-III namar ba ka phase-I bad II, ka la kut, la iathuh na ki nongtrei haba twad jingtip.
Na ka liang ka Public Accounts Committee (PAC) ka la iakren ia kane hynne ka sngi bad ka la bthah ia ka tnad ka koit ka khiah ban pynbeit ia kane ka jingdkoh ban pynlait ia ki paidbah na ka jingkynduh jingeh.
“Donkam ban thaw ia ka jingtreikam ka ban iarap ia ki paidbah bad ban iada ia ki nongpang, ym ban shu ai mon ha ki kompeni”, la ong u chairman ka PAC u Bah Paul Lyngdoh.