Sah sa tang ka Mawshynrut bad Mawlai, ong u bah Witting Mawsor

Shillong, 8 Jymmang:
U MLA ka HSPDP na Mawshynrut konsti-twensi u la kren diaw mynsiem halor ka jingpynslem ka sorkar ban plie noh ia ka Mawshynrut Civil Sub-Division bad u la ong ba na ka por sha ka por u la leit ban ia kynduh ia u myntri rangbah ka jylla u Dr.Mukul Sangma ban ia kren ia katei ka kam hynrei hadien ba la kular bunsien u la ong ba u Dr.Mukul u la pynsangeh shi pynsangeh , “Khadduh eh nga la wan ia kren dang ha ka 2 tarik mynta u bnai, u la ong ba mynta yn ym buh por shuh hynrei un plie beit ha u bnai jylliew, nga kyrpad ia u myntri rangbah ba un bat ia katei ka kular jong u” ong u bah Witting haba ia kren bad u Rupang.
Utei u MLA ka Mawshynrut u la ong ruh ba baroh kiba don ha ka Budget lane ka mang tyngka jong ka sorkar la dep ban plie lut mynta hynrei don ruh ki tnad ki bym don ha ka Budget kiba la plie thymmai, “Ngam tip shuh kumno ka sorkar kan leh haba ka leh kumne , wat ki bym don ha ka Budget ruh ka sorkar ka nud ban plie naei kan ioh pisa, ngam tip shuh ka kynhun myntri sorkar ka pyrkhat kumno ne ngam tip shuh ioh kiba don ha ka bor ki shu leh la ka leh ioh long la ka long” ong biang u bah Witting.
U bah Mawsor u la pynkynmaw ba katkum kaba paw ha ka jingkren mang tyngka 2016-2017 jong u myntri rangbah ha ing dorbar ka long ban plie saw tylli ki Civil Sub-Division kita ki long ka Pynursla ha East Khasi Hills ,ka Mawshynrut, ka Chokpot bad ka Raksamgre. “Kitei baroh la dep plie lut sa tang ka Mawshynrut marwei, ngam tip balei ki pynslem kumne” u la ong. Nangta u la iathuh ba la mang ban thaw saw tylli ki C&RD Block bad kitei ki long ka Mawlai , ka Bhoirymbong, Demdema Block bad ka Rerapara.
“Kitei ruh la dep plie lut sa tang ka Mawlai, hynrei nalor kitei ki 3 tylli ruh la pynkha biang sa ia kiwei dei kiba la dep plie mynta” ong u bah Witting haba kdew ia ka Bajengdoba C&RD Block, ka Sohiong , ka Wapung , u la bynrap shuh shuh da kaba ong biang “Ia kiba bym don ha ka mang tyngka lah ban plie , ia kaba don ym lah-ngam tip shuh ka mut aiu, naei kein ka sorkar kan khlong pisa, kitei ruh tang kiba nga tip -ngam tip shuh ioh dang don kiba ngam tip ruh”.
Shuh shuh u la pynkynmaw ba la pynkiew kyrdan ruh 15 tylli ki Police station ha ka jylla. Kine ki long ka Diengpasoh Police Station ha East Khasi Hills, Umsohlait ha Ri-Bhoi district, Nonghyllam ha South West Garo Hills, Mawshynrut ha West Khasi Hills, Lumshnong ha East Jaintia Hills, Nartiang ha West Jaintia Hills, Damal Asim ha West Garo Hills, Hallidayganj ha West Garo Hills, Salmanpara ha South West Garo Hills, Damalgre ha South west Garo Hills, Gasuapara ha South Garo Hills, Siju ha South Garo Hills, Silkigre ha South Garo Hills, Sangkhinigre ha South Garo Hills bad ka Chiading ha East Garo Hills district. “Ha Mawshynrut kaba mut ha Riangdo ym pat shym la plie haduh mynta ruh” u la ong biang.