Sah lyngngoh ki skul, ia ka jingthmu provincialise ka sorkar

Shillong, 24 Naitung:
Bun ki nongpyniaid jong ki skul bapher bapher haduh mynta ki dang sah lyngngoh ia ka jingthmu jong ka sorkar ban shimti hi noh ia ki skul Deficit ki bym dei jong kano kano ka niam lait noh ia ki skul ba dei niam.
Dang shen ka sor kar ka la ai jingthoh sha baroh ki nongpyniaid jong ki skul ba ki dei ban ai ki jingtip sha ka sorkar sha phang baroh ki jingdon jingem jong ka skul khnang ba ka sorkar kan ioh leh ia kaba donkam shwa ba kan shimti noh.
Hynrei katkum ka jingtip la tip ba bun ki nongpyniaid jong ki skul bapher bapher kim pat lah ban shemphang halor ka nongrim ba ka sorkar ka thmu ban leh.
U Rupang u ba la ioh ban iakren bad ki katto katne ngut ki briew na ka tnad Education ki la iathuh ba haduh mynta na ka liang jong ki kim tip eiei halor kane ka kam ba ka sorkar ka thmu hynrei haduh mynta ki dang ioh sngew tang ia ka ktien provincialise hynrei ia ki kam ba dang sah halor kane kim tip eiei namar ba ka dang don ha ka kti jong u Minister.
“Shisien ba la shimti ka sorkar ia ki skul Deficit baroh la hap lut ha ka bor pyniaid jong ka sokar”, la ong uwei u nongtrei jong ka tnad Education.
Bun ki skul ha kane ka jylla ki dei ba pyniaid da ki kynhun niam kane ka jingthmu jong ka sorkar ban shimti tang ia ki skul bym dei niam ka lah ban pynsah umdum ia kiwei pat ki nongpyniaid skul.
Lah ban pynkynmaw ba kham mynshuwa ki nonghikai ki ba hap hapoh ka lama jong ka Khasi Jaintia Deficit School Teachers Association (KJDSTA) ki la dawa na ka sorkar ba ka dei ban shimti tang ia ka kam hikai ym ba kan shimti ia ki bor pyniaid jong ki skul.