Shillong:Mynhynnin ka sngi na ka liang ka Hyn ñiewtrep National Youth Front (HNYF) East Khasi Hills Unit, ka la leit ban jurip ia ka Traditional & Cultural Centre da ka Khasi Hills Autonomous District Council (KHADC) harud ka pung Umiam ha Jingkieng Kalong.
Ha kane ka jingleit jurip, na ka liang ka seng ka la lap ba kine ki jingtei jong ka District Council, ym pat lah ban pyndep bad ka la sah khong reng.
Kat kum ka RTI kaba ka seng ka la ioh, la lap ba ia kane ka shlem tynrai, la mang pisa haduh T.12 klur tyngka lyngba ka skhim ba la bhah da ka 15th Finance Commission jong ka Sorkar India.
Haba ia kren bad ki lad pathai khubor, na ka liang u President u Bah Bless Son Dkhar u la ong, ba haduh mynta ka District Council ka ladep pyllait pisa ia ka pisa haduh T. 9.37 klur ban shna ia kane ka shlem tynrai, katba ka rukom shna bad ka jingpynlut pisa kam iahap satia.
U la iathuh ba katkum ka RTI, kaba na ka liang ka seng ka la lap ba ka la mang pisa na ka bynta ban shna ia ka ne ka long T.12 klur bad ladep ban siew sha u Kontraktor T. 9.37 klur bad ka pisa kaba sah ka long sa T. 3.13 klur.
“Katkum ka jubab RTI ym shym la ai jubab satia la ka jingshna ia kane ka shlem tynrai la shim rai ne em da ka Executive Committee. Ym shym la ioh jubab ruh la ka KHADC ka la pynbna (advertise) ne em ia ka Work Order. Ngim shym la ioh jubab la ka KHADC ka shna ia kane ka shlem tynrai ha ka jaka jongno, la ki shu shim wai lane ka dei ka jaka jong ka Council,” ong u Bah Dkhar.
“Ba ngim ioh ia ka jubab, ngim banse ban wan jurip hi dalade ia kane ka jaka khnang ban ianujor ia ka pisa kaba la mang T.12 klur bad ka kam ba la pyntrei,” u la ong.
“Ngi sngewsih ba ka surok ba la mang pisa haduh T.3 klur katkum ka jubab ba ngi ioh lyngba ka RTI bad ba ka pisa ruh ladep sei, hynrei ka jingshna ia kane ka surok kam iahap satia bad ka jingpynlut pisa,” la kynnoh une u nongialam ka HNYF.
“Haba ngi kylli (lyngba ka RTI) ia kane ka surok, ngim ioh ia ka jubab kaba shai, la ka dei kaba shu maramot lane ka dei kaba dang shu shna thymmai. Ngi lap (ha ka jingjurip) ba ka dei tang ka surok ba shu maramot bad kaba shu siang maw bad tap da ka rong malu mala. Ia kane ka surok la pyntrei da ka M/s Rodeka Enterprise,” la iathuh shuh u Bah Dkhar.
U la kynthoh ruh ba ka pisa kaba la pynlut haduh T.9.37 klur la shna tang 10 tylli ki Guest House, kawei ka pung jngi (swimming pool) bad iwei i iing rit.
“Hato lada kheiñ antad tang T.5 lak ban shna ia kawei ka Guest House na ka bynta 10 tylli ruh kan da long tang T. 50 lak. Ka Swimming Pool lehse T. 10 lak bad la kumno kumno kan poi tang T.60 lak. Hato ka surok haduh 3 klur tyngka lah hi ban ngeit haba shu maramot tang kumne nalor ba ka surok ka dei kaba la don lypa naduh ka por ki Phareng. Kane ka jingpyni ba la pynlut haduh T. 3 klur ka dei tang ban shu tap eitmiaw,” la kynthoh u Bah Dkhar.
Katkum ka jingiathuh jong u Bah Dkhar, ha ka 27 tarik, Nailur, 2019 la sei ia ka pisa T. 50 lak. Ha ka 20 tarik, Risaw, 2019 la sei ia ka pisa T. 10 lak bad ha ka 14 tarik, Naiwieng, 2019 la sei T. 1.50 klur da ki Kontraktor ba pyntrei ia kane ka projek.
Haba kynthoh halor ka jingsiew Bill jong ka KHADC ha u Kontraktor ba pyntrei kane ka projek, u la ong, “Kaei kata ka tnat treikam kaba shu ai pisa sha u Kontraktor 1 klur ka pisa haba ka kam ym pat dep lut. Ki don shibun kiba trei kontrak ha ki tnat treikam bapher bapher. Ha ka shi snem ki Kontraktor ki lah ban ioh tang shisien lane ar sien ka Bill hynrei ha KHADC tang da ki bnai la ioh ban sei T. 1.50 klur. Ha ka 30 tarik, Nailar, 2018 ki la sei biang ia ka pisa T. 1.30 klur, ha ka 20 tarik, Jylliew, 2018 la sei sa T. 70 lak, ha ka 3 tarik Jymmang, 2018 ki la sei pisa T. 1.50 klur. Hangne ngi sngewthuh shai, uei uta u kontraktor ba pyntrei.”
“Don hi mano mano ban shu ai ia ka pisa khlem pat dep ka kam ne kane ka pisa ka poi sha ka pla jongno re jongno. Hato da kane pisa phin ieng elekshon ne phin ia khaii kulai ha KHADC,” la kynthoh u Bah Dkhar.
Na ka liang jong ka seng ka la dawa ba dei ban thung tohkit da ka Central Bureau of Investigation (CBI) halor ka jingshna ia ka shlem tynrai ne ka Traditional & Cultural Centre da ka Khasi Hills Autonomous District Council (KHADC) harud ka pung Umiam ha Jingkieng Kalong.
Phi don ban ong eiei?