Sah kut ka SMC bym pat, kynriah ia ka TB Hospital

Shillong, 23 Risaw:
Ia ka Shillong Medical College (SMC) ka ban tei lyngba ka jingiatreilang hapdeng ka sorkar bad ki riew shimet ne da ka PPP, ka dang sahteng na ka bynta bym pat kynriah ia ka Reid Provincial Chest Hospital (RPCH) sha Umsawli, kaba don ha sor Shillong thymmai.
Haduh mynta ka sorkar kam pat lah ban aiti ia ka jaka ha Mawbah kaba don ha RPCH.
“Ngim pat lah ban aiti ia ka jaka ha Mawbah ha kaba ka RPCH ka don mynta sha ka KPC Medical College bad Hospital, Jadavpur na ka bynta ba kan sdang ia ka kam. Ka jingsdang ia ka kam kan long hadien ba la dep aiti ia ka jaka hadien ba la dep pynkynriah ia ka TB hospital sha Umsawli,” la ong u ophisar ka sorkar jylla.
Kham mynshwa ka sorkar jylla ka iasoi ia ka Concessionaire Agreement ban shna ia ka Shillong Medical College lyngba ka Public-Private Partnership (PPP).
La mang na ka bynta kane ha ka jinglut kaba kot T. 250 klur.
Katba ia ka Tura Medical College ka sorkar jylla ka dang bunkam bha ban pynkhreh ia ka Detailed Project Report (DPR) na ka bynta ban tei ia ka jaka pule doktor ka Medical College (MC) ka sorkar ha Tura.
“Ka jingpynkhreh ia ka DPR ka la dang iaid shaid shaid bad hadien ba la dep, yn sa aiti sha ka sorkar pdeng ban ai pisa”, la ong u heh ka tnad ka koit ka khiah hynne ka sngi Palei.
Katkum ka jingong jong u ophisar ka tnad ka koit ka khiah, ka sorkar pdeng ka la dep kular ban pynsted ia kane ka kam na ka bynta ban buh ia ka jaka pule doktor ha kane ka jylla.
Kham mynshwa ka sorkar jylla ka la bynshet ia ka kam ban pynkreh ia ka DPR na ka bynta ka Tura Medical College-cum-Hospital ha ka kompeni ba na Delhi ka Telecommunications Consultants India Ltd. Kane ka kompeni kan pynpynkhreh ia ki jingdonkam na ka bynta ki jingdonkam na ka bynta kane ka kam.
Kane ka Medical College la dep ban ioh jaka ha ka jingheh kaba 99 akar bad kan ngiam ban sumar haduh 500 ngut ki nongpang nalor 100 ngut ban pdiang ia ki samla pule doktor man u snem.
U ophisar kane ka tnad u la iathuh ba ka jingsiew ia ka bai shim jaka na ka bynta kane ka jingthmu la dep siew bad ka sorkar ka la pynlut T 3.40 klur ban siew bai jaka.