Sah ha suin ka VAB, dang don shabar u Lat ka jylla

Shillong, 28 Jylliew: 
Ka Vilage Administration Bill (VAB) ka KHADC kaba la kyrkieh bad khohreh palat ban ioh ia ka jingpdiang na u Lat ka jylla, ka dang sah ha suin. Mynta u Lat ka jylla u V Shanamunathan um don ha ka nongbah bad u dang don jingleit shabar bad u lah ban wan phai ha ka taiew ban wan, katkum ka khubor.
Ha ka taiew ba la dep, ka tnad District Coun cil Affairs ka jylla ka la phah biang sha u Lat ryngkat ki jingpynshai ba u la pan kham mynshwa halor kane ka Bill. Ha ka jingshisha u Lat ka jylla u kwah ban pan jingmut shwa na ki paidbah halor kane ka VAB hynrei na ka liang ka sorkar lyngba ka DCA kam shym la leh kumta bad ka la shu ai tang ka jingpynshai sha u Lat halor ki daw ba u la  pan.
Ka la don ka jing iakren la ka sorkar jylla lyngba ka tnad DCA ka la iasyllok ne em bad ka KHADC ban ai ia ki jingpynshai sha u Lat halor kane ka VAB kaba la shah kyntait ha ka sien ba nyngkong.
Ha u bnai ba la dep, u Lat ka jylla u pdiang ia ka Ordinance kaba Meghalaya Local Administration (Empowerment of Traditional Institutions, Traditional Bodies, and Headmen in Governance and Public Delivery System) Ordinance, 2015 ban pynkup bor ia ki Rangbah Shnong hynrei ia kane ka Ordinance  ym don ba pdiang ha kaba ki Rangbah Shnong ki la kyntait ia ka.
Ym pat tip ha kano ka dur kane ka VAB kan long kam  bad ka paw ba u Lat ym shym la dei u niang kohnguh ia kaei ba ka sorkar jylla ka la phah bad u da pyni bor bad mynta ka sorkar jylla kaba synshar ka Congress ka la iakynduh jingeh bad u Lat ka jylla.