Sa uwei u EM na ka HSPDP, yn

Shillong, 2 Naiwieng:
U CEM ka KHADC u Bah Adelbert Nongrum u lah ban thung noh sa uwei u Executive Member (EM) na ka party HSPDP ha kane ka Executive Committee (EC) ha kane ka taiew ba mynta.
“Nga dang thmu ban pynrung sa uwei u MDC na ka HSPDP kum u EM hapoh kane ka taiew namar ba nga la dep pynthikna ba ngan leh hadien ba la kut ka dorbar ka Council”, la ong u Bah Nongrum haba kren ha kane ka sngi u Blei.
Ka HSPDP ka la tyrwa ia ka kyrteng jong u MDC ka Mawshynrut u Bah Morningstar Mawsor.
Ka HSPDP ka la dawa ia kane ka shuki bad kam ba ka dei kum ka bhah jongka.
“Ka dei ka bor laitluid kum u CEM ban pynthikna ba baroh ki paralok ka ARPA kin ioh ia ka bhah mar kumjuh khlem shah shiliang. Ka long kaba bakla ban kynnoh ba ka HSPDP ka rhah bor”, la ong u Bah Nongrum.
U CEM ka KHADC u la ong ba ka kyrteng jong u EM ba thymmai yn sap hah sha u Lat ka jylla ban ioh ia ka jingmynjur.
Ka MDC ka Nong shken ka Kong Grace Mary Kharpuri kan neh kum ka EM hadien ba u MDC ka KHNAM na Mawkhar u Bah James Ban Basaiawmoit u la rai ban iehnoh ia ka shuki.
Ka jingdawa shuki ka HSPDP ka long ba ka kwah ban pynsloit shuki ia ka Kong Kharpuri hadien ba ka la phet noh na HSPDP.