Sa tang 8 sngi, sdang shongshit ka elekshon shiteng samoi

Shillong, 5 Nohprah:
Sa tang 8 sngi, kata ha ka 13 tarik mynta u bnai kan long ka elekshon MDC shiteng samoi 6 ha KHADC bad kawei ha JHADC, kumba ka long mynta ka elekshon ka la sdang shongshit bha ha baroh 7 tylli ki konsti-twensi. U nongthohkhu-bor u la twad jingmut ia ka jinglong jingman ka saiñpyrthei ha kitei ki konstitwensi bad la ioh jingtip ba ha baroh ki konstitwensi ka jingia-khun kan dei kaba ia khaid bha.
Hapoh katei ka 8 sngi la ioh jingtip ba ki seng saiñpyrthei bapher bapher ki la pynkhreh ia ki prokram jingialang paidbah jong ki ha kaba la ong ba lashai ka sngi kan don ka jingialang heh jong ka seng BJP ha Smit, ha ka sngi thohdieng kan long sa ka jingialang paidbah jong ka seng HSPDP bad ha ka sngi saitjain pat kan long sa ka jingialang paidbah jong ka seng UDP ha Laitkor bad katei ka dei tang ha Nongkrem konstitwensi.
La twad jingmut ruh ha kiwei pat ki konstitwensi , ha Nongkrem konstitwensi bun ki paidbah ki shim ba ka jingiakhun mynta kan dei kaba shongshit bha hapdeng ka HSPDP bad ka UDP kata hapdeng u bah Hubert Riang bad u bah H.S Shylla. Ha Laban-Mawprem konstitwensi la ong ba ka jingiatan tyllai kaba jur bha mynta ka dei hapdeng ka HSPDP bad ka NCP kata hapdeng u bah Banrikupar Wahlang bad u bah Ricky Shullai.
Ha Sohiong la iathuh ba ka jingiakhun kan shyrkhei bha hapdeng ki 3 ngut kata u kyrtong ka UDP bah Wankupar Syiemlieh, u kyrtong ka Congress u ba Nathaniel Rymbai ( khun bah HDR Lyngdoh) bad u kyrtong ka HSPDP u bah Samlin Malngiang.
Ha Mairang la ong ba ka jingiakhun mynta kan dei hapdeng ki lai ngut ki kyrtong -ka UDP u bah Equator L Nongrang, u kyrtong ka BJP bad Councellor Wahlang bad u kyrtong ka HSPDP u bah Alexander Kharsyntiew.
Ha Rambrai la ong ba ka jingiakhun kan long hapdeng ka seng Congress-Kimfa Sidney Marbaniang bad u bah World champion Paliar ka HSPDP bad ha Mawthadraishan pat la ong ba ka jingiakhun ba satar bha kan long hapdeng u kyrtong ka UDP u bah Jambor Nongwar bad u kyrtong ka seng HSPDP u bah Landingstar Warjri.
Katkum ka jingioh lum jingtip une u nongthohkhubor la iathuh ba ha kiba bun ki konstitwensi mynta ka kynti ka jingiakhun kan long bei thapdeng ka UDP bad HSPDP bad la sngewthuh ba ka seng Congress mynta ka kynti ka la jah kyrteng lait noh tang ha Sohiong konstitwensi kaba ia khun da u khun u bah HDR Lyngdoh bad ha Rambrai konstitwensi ba katei ka seng ka dang don ka jingiakhun.