Sa tang 15 phut, ka pung Umiam, kan sa shlei mam

Shillong:Na ka jingbteng u slap ha kine ki khyndiat sngi, ka pung pynmih bording ha Umiam ruh ka la nang kiew man ka sngi. Haduh ka mynta ka sngi ka jingkiew jong ka pung Umiam (Umiam Hydro Electric Power Station Stage-1) ka la kot sha ka 3205.75 phut.

Kane ka mut ba ka pung kan sa dap sa tang 15 phut namar ba ka lah ban bat ia ka um tang haduh ka 3220 phut.

Hynrei ha kajuh ka por, ka jingpynlip ding ka dang bteng ha ka jylla watla kane ka pung kaba bsa ding bun tam ha ka jylla. Dang shen, u myntri ka tnad bording u AT Mondal u la ong ba ka daw ka jingbteng ia ka jingpynlip ding ka dei namar ba ia ka ding kaba la pyndonkam ha ka por ba tyrkhong ka pung Umiam, la hap ban siew kylla sha ki kompeni ba la thied.