Sa shisien la pulom biang ka jingpynlong ia ka Public Hearing kaba thmu ban pynlong da ka SPB

Sa shisien pat ka jingthmu jong ka State Pollution Board ban pynlong ia ka jingpynsngew paidbah(Public hearing) ha kaba iadei bad ka jingthmu jong ka Star Cement Ltd. ban shim jaka sa 42.2 haktar ban ioh khlong ia u mawshun ha ka shnong Brichyrnot ka la pulom biang sa shisien hadien ba ki sengbhalang bad ki paidbah nongshong shnong ki la pynpaw ia ka jingpyrshah ia kane ka jingpynsngew paidbah.

Kawei kaba ki paidbah ki la pynpaw ia ka jingbitar ia kane ka jingpynsngew paidbah( Public hearing) ka long halor ka jingpynkylla ia ka jaka ba ki thmu ban pynlong ia kane ka Public Hearing namar ki SPB ki thmu ban pynlong ha ka shnong Brichyrnot hynrei mynta ka sngi ki la pynlong ha ka shnong Lumshnong khlem da ioh ia ka jingmynjur na u rangbah shnong kane ka shnong.

Ka jingthmu ban pynlong ia ka jingpynsngew paidbah ka la kut noh hadien ba na ka liang u rangbah shnong ka shnong Lumshnong u bah Change Rymbai u la phah pynsangeh halor ka jingpynkhein ia ki kyndong shnong ba ki khlem shim jingbit(NOC) ban pynlong ia ka jingpynsngew paidbah (public hearing) ha kane ka jaka da kaba ther tyngeh ruh ia ki briew ka SPB ba ki khlem pan jingbit ban pynlong ia ka pubic hearing ha Lumshnong bad u la ong ruh ba lada kim mih na kane ka jaka um lah ban kit khlieh ma u lada ka jia kano kano ka jingjia

Na ka liang ki Sengbhalang kiba kynthup ia ka United Hynniewtrep Movement Khasi Student Union, Jaintia Student Movement Hynniewtrep Youth Council, Hynniewtrep National Youth Front ha ryngkat ki nongshong shnong katei ka thain ki la mih paidbah bad phah pynsangeh ia katei ka jingpynsngewpaidbah (Public Hearing).