Shillong, 14 Naitung:
Ka Hynniewtrep Social Welfare Organisation ha ka jingialang jong ka CEC kaba la long mynta ka sngi ha shillong ka la rai ban iai ap sa mynta ka taiew ia u DC ka East Khasi Hills ban khang noh ia ki range/beat office ka KHADC lyngba ka tnad Forest kiba la pyniengbeain ha ki rud surok National highway ban lum pisa beain na ki trok kit dieng.
Ha ka jingpynlait kyrwoh ka seng ka la ong ba ka la dep ban ujor sha u DC ka East Khasi Hills ia ka ba u DC u la kular ban phah ia ki Magistrate ban leh ia ka badonkam hynrei haduh mynta dang iohi ba kitei ki Beat/Range office ba la pynieng da ka KHADC ha Mawiong bad ha Puriang ki dang bteng ban lum pisa beain na ki trok kit dieng khlem da ai ia ka rusit sha ki trok kaba long pyrshah ia ka ain namar wat ka Kashari ka la khang pyrshah ban pynieng kino kino ki khyrdop ban lum pisa khamtam ha ki National Highway ha kaba iadei bad katei ka bynta.
Halor kane, ka seng ka kyrmen ba u DC ka East Khasi Hills un khang noh mardor ia kitei ki range/Beat office namar wat na ka liang jong ki paidbah ruh ki la ujor sha ka seng namar ka jingpynieng ia ki trok da kitei ki nongap khyrdop ka la ktah ia ki paidbah namar ka ju wanrah ia ka sahkut ha kitei ki jaka bad la da ka jingdawa jong ka seng kam seisoh na ka liang jong ka seng kan sa leit ban kynduh ia u Chief Secretary ka sorkar jylla bad kumjuh ia u Chief Minister ka sorkar jylla ban tuklar lem ha kaba iadei bad katei ka mat ba ka seng ka ieng namar kam myntoi ban pynieng ia ki office tang na ka bynta ban lum pisa beain bad kam myntoi ban rakhie ia ka World Environment day tang shi sngi katba man la ka sngi pat ia bam pisa.
Ha kawei ka liang, ka seng ka ai jingiaroh ruh ia u bah E Mawkdoh Range officer ka Nongpoh (T) jong ka tnad forest u ba la shimkhia ban bat ia ki trok kit dieng beain bad ban peitngor shuh shuh namar dang bun ki kali kiba kit dieng beain kiba wan na Jaintia Hills bad na West Khasi Hills ha kaba naka liang jong ka seng ruh kan iai buddien bad kan leh ia ka badonkam bad ha kajuh ka por na ka liang jong ka seng ka la rai ruh ban ai jingkyrshan i a ka FKJGP bad ka KSU halor ka jingpyrshah iaka jingthmu tih Uranium da ka UCIL ha Mawthabah kaba don ha South West Khasi Hills bad ka seng ka kyrpad ruh ia ki paidbah sha kito ki thain kim dei ban kmen tohhoh ia ka Surok 2lane ioh ka kyrtoh kylla nadien. Ka la ong ba ka KHADC kam dei ban ai NOC sha ka UCIL naka bynta ban khlong ia u Uranium ha katei ka thain, la ong u Bah Wanphailang Warjri u General Secretary H SWO.
Phi don ban ong eiei?