Sa shi snem ka elekshon, ki paidbah kin sngewthuh, ong u President BJP

Shillong, 19 Nohprah:
U President ka BJP Meghalaya u Bah Shibun Lyngdoh u la ong ba ka elekshon MLA ha ka jylla kan sa wan sa shi snem tam bad kyrmen ba ki paidbah kin sa sngewthuh ia ka BJP.
Haba kren hadien ba la shah kput ha kane ka elekshon MDC shiteng samoi, u Bah Shibun u la ong ba ka jingbym poi ki kyrtong ka BJP ha kane ka elekshon ba dang shu dep, kam dei u diengpynkiang ia ka lynti iaid ka party ha u 2018 ha kane ka jylla.
“Ngi don sa shi snem tam shwa ban leit sha ka elekshon MLA ha u 2018, ngin trei shitom ban pynsngewthuh ia ki paidbah ba ka BJP ka ieng ha ka nongrim ban rat dyngkhong ia ka bamsap”, la ong u Bah Shibun.
U la kam ba ka elekshon ba dang shu dep, ka dei tang ka jingtynjuh ia ka party ba kan lah ban lehbha nangne shakhmat.
Kham mynshwa, u Bah Shibun u la kynnoh ba kiwei ki seng sain pyrthei, khamtam kiba la don ha ka bor, ki thied da ka pisa ia ki paidbah bad kiwei ki buit jongki, ban pynshit ia ka BJP ba ka pyrshah Khristan kum ka jingpynbna ia ka Good Governance Day kaba ka party kam pat ioh ban pynshai bha bad kawei pat ka dei ka jingther ki party ba ka BJP ka don ha NEDA bad kam myntoi ban jied ia ka, bad ka bha ban jied beit ia ki party riewlum ba don lang.
U la ong ia ka mat elekshon ka party ruh ki paidbah kim pat sngewthuh bad ki dang don ka jingsngew ia ka BJP da ka jingpynshit bad ialam bakla kiwei ki party.
“Ia ka mat elekshon ka party, kam dei ba ki paidbah kim pdiang hynrei ki dang shah pynsngewthuh bakla ha ka jingpynshit jong kiwei ki party da kiwei ki mat kum ka jingkynnoh ba ka BJP ka dei kaba pyrshah Khristan, kaba ha ka jingshisha kam dei satia kumta”, u la ong.
Lah ban kdew ba napdeng kine ki 7 tylli ki MDC konstitwensi kiba ka BJP ka la pynieng, ka Mairang ka dei kawei kaba wan nyngkong duh ha ka jingioh vote hynrei baroh ki shu ioh thohmut thohmat.
U kyrtong jongka, u Bah Counsellor Singh Wahlang, u la ioh haduh 6601 vote ban wan ha ka kyrdan balai.
Kiwei pat ki kyrtong BJP kiba ioh vote ha kane ka kynti, kynthup na konstitwensi Pariong-Mawthadraishan konstitwensi u Bah Thandarsingh Warjri uba kamai 522 vote, bud sa u kyrtong na Rambrai Bah Denestar Pariong 522, ka Mamiry Nongkhlaw na Nongkrem (200), Kyntiewborlang Syiemlieh na Sohiong-Nongspung (190) bad u Bah Smen Kyndait na War East (65) vote.