Sa saw tylli ki iew khappud, khlem ioh ka thain Dawki

Shillong, 15 Lber:
Ka sorkar pdeng lyngba ka jingiakren ka sorkar jylla ka la pdiang ban plie ia saw tylli ki iew khappud ha kane ka jylla kiba don markhap bad ka Bangladesh na ka bynta ban kyntiew ia ka ioh ka kot jong ki paidbah.
Hynrei kaba pyn diaw mynsiew ka long ia ki paidbah ka thain khappud Dawki, Lyng khat namar ba ym shym la don satia kano kano ka jingthmu ban plie ia ka iew khappud ha katei ka thain kaba ju iathied iapet bha ha ki por naduh mynshwa shwa ban wan ka thma India bad ka Bangladesh kaba la kylla kham rit noh mynta, wat la ka dang don ka iew malu mala.
Haduh mynta ka sorkar ka la pdiang ban plie sa saw tylli ki iew khappud ha kane ka jylla kynthup lai tylli ha Khasi bad kawei ka Garo Hills. Kiba ha rilum Khasi ki kynthup ia ka Iew Khappud ha Bholaganj ha Shella kaba markhap bad ka Sylhet, ka Bangladesh, ka Iew Khappud ha Nalikata kaba don ha West Khasi Hills kaba markhap bad ka Saydabad ka Bangladesh bad ka Iew Khappud ha Ryngku ka thain Balat kaba markhap bad ka Bagan Bari ka Bangladesh.
Bad kawei ka dei ha Shibbari kaba don ha South Garo Hills kaba don markhap bad ka Bhulyapara ka Bangaldesh.
Ka jingpynkhreh ban plie ia kine ki iew ka la iaid shaid shaid bad la dep aiti ruh sha ka sorkar India ka tnad Commerce and Industry na ka bynta ba kan mang pisa ia kine ki iew, la ong u Myntri Rangbah ka jylla u Dr Mukul Sangma haba jubab ia ki jingkylli ha iing dorbar.