Sa lai bnai yn bteng ka Hillstorm-3, ban khynra lehnoh ha Garo Hills

Shillong, 08 Lber:
Ki pulit ka Megha laya ki la ong ba ka jing khynra lehnoh ha Garo Hills ka Hillstorm-3 kan bteng sa lai bnai. Ki pulit Commando la phah shuh sha Garo Hills ban shang sha ki khlaw bad ki raieh raidam u lum Durama kaba dei ka ktem jong ka GNLA bad kiwei ki kynhun lehnoh. Ki pulit ki la pynlong ia ka jing khynra ha katei ka jaka la ar taiew, la ong ka khubor na ki pulit.
Ia ka Operation Hillstrom-3 la sdang da ki pulit ka Meghalaya ha ka 24 tarik Rymphang ha Garo Hills district bad ha West Khasi Hills district ban khynra naphang ia ki jaka rieh jong ki lehnoh shapoh khlaw.
Haduh mynta saw tylli ki ktem ka GNLA la pynpra, 70 tylli ki bom Improvise Explosive Device (IED), 1475 tylli ki tikli bad shiteng kilo ka gelatin la ioh kurup.
Ka khubor pulit, ka la ong ba katkum ka khubor syntiat, la ioh jingtip ba bun na ki nongialam ba kham hakhmat ka GNLA kum  u Rupanto ba khot sin kum u Toding, u Dy CinC  bad ka kynhun jongu bad ki nongialam ka ASAK  kum u  Reading T Sangma bad ka kynhun jongu ki la jam sha u lum Durama bad sah ha ka thain  South Garo Hills.
Ki bor pulit la phah shuh sha kitei ki jaka ban pynlong ia ka jingap thap ha ki jaka ba ki leit bad ban pynjur ruh ia ka jingkhynra ha man ki nongkyndong kiba don sawdong utei u lum.
“La rai ba ka jingkhynra lehnoh ka Operation Hillstorm-3 yn bteng sa lai bnai. La phah pulit shuh Special Force-10 Commando, kin leit ban khynra ia ki lehnoh ha katei ka thain, ban iarap shuh shuh ia ki pulit  SWAT  kiba la don lypa ha katei ka thain ka Gro Hills.
Ka tnad pulit ka jylla ka la dep thoh sha ka sorkar ban phah sa 12 kompeni ki  Central Armed Police Forces  bad hynriew kynhun ki CoBRA ban iarap ia ki pulit ka jylla ban leit khynra ia ki lehnoh ha Garo Hills ha kine ki lai bnai ban wan.
Ka khubor pulit, ka la ong ba hadien ba ki pulit ki la pynlong ia ka jingkhynra kaba jur bha, bun ki dkhot ka GNLA ki la leit sha ki nongialam sengbhalang, seng niam ban iakren ban wan pyndem wait noh. Na ka liang ka tnad pulit ka ong ba ka kloi ban pdiang ia ki lehnoh kiba wan pyndem wait tangba ki dei ban pyndep ia ki jingdonkam ka ain.