Sa ka skul Mophot jong ka SBUK

Shillong,9 Nailar:
Ka Seng Biria U Khasi ( SBUK) ka la pynbna ha ka sngi saitjain jong taiew ba shen kan sa plie noh ia ka skul Mophot jong ka kaba ym donkam bai rung bai mih, ym donkam bai uniform bad kaba lait ei lut nadong shadong. Katei ka dei ka skul ban hikai ia ka ktien Khasi na ka bynta kiwei pat ki jaitbynriew ki bym dei Khasi kiba shong basah ha kane ka jylla.
Ka jaka ban pynlong ia katei ka skul ka dei ha kawei na ki kamra klas jong ka Shillong, Law College kaba don ha Dhankheti, katei ka skul kan long tang shisien shi taiew kata tang ha ka sngi thohdieng naduh ka por 5 baje janmiet. Ha katei ka skul yn hikai da ki nonghikai kiba la tbit ba kynthup ia ka kong Lily Kharpran ka nonghikai kaba nang lut jan manla ki ktien naduh ki ktien Assamese, Bengali, Nepali bad kiwei.