Sa ka shnong, ba 60 tylli ki iing, thaw biang ka China ha Arunachal

Itanagar:Ka China, ka la thaw sa kawei pat ka shnong ha Aruna chal Pradesh bad katei ka shnong, ka don 60 tylli ki iing, ong ka khubor jong ka NDTV. La iathuh da ki lad khubor, ba kitei ki jingtei, kim shym don satia ha u snem 2019, hynrei mynta hadien shisnem, ki la mih kitei ki iing thymmai.

Dang shen ka Pentagon, ka pyn shisha, ba ka China, ka la rung sha ki bynta jong ka Arunachal Pradesh, ha kaba ka la tei ia ki iing ki sem ha katei ka jylla.
Katei ka jingtei beain, ka dei ha ka jingjngai kaba 93KM sha mihngi jong ka China.

Kane ka jingtei kaba thymmai, ka dei kaba don haduh 6 Kilometre, ha u pud u sam jong ka India, ha ka bynta jong u Line of Actual Control (LAC). Ym shym la lah ban pyn thikna, la ia kitei ki iing, la don ba pyndonkam ne em.
Ka khubor na ki shipai India, ka kdew, ba katei ka jingtei, ka dei ha u pud jong ki ar Ri, lane ha u Line of Actual Control bad la iathuh ba kitei ki jingtei, ki dei ha Shi-Yomi district jong ka Arunachal Pradesh, ha kaba ki don ki jingtei iing bad ba la pynher da ki lama jong ka China.