Sa ka pakhang surok, 3miet kynthih, rai ki sengbhalang Naduh lashai “9baje mynmiet, haduh 5baje mynstep”

Shillong, 2 Nailur:
Hadien ka pakhang shnong kaba 12 kynta, ki sengbhalang mynta ka sngi ki la pynbna da ka pakhang surok miet kaba lai miet kynthih naduh ka 4 tarik Nailur haduh 6 tarik Nailur. Kane ka pakhang surok miet kan treikam naduh ka por 9 baje mynmiet haduh 5 baje mynstep ha kine ki lai sngi kynthih.
Haba pynbna ia ka ne, na ka liang u vice president ka KSU u samla Frederick Kharmawphlang, u la ong, “Ngi la rai ban pynjur ia ka jingiakhih namar ba ka sorkar jylla ka dang mynthi ia ka jingdawa ban pyntreikam ia ka ILP,”
U la ong ba hadien ba la iashong jingialang mynta ka janmiet, ki sengbhalang ki la pynbna ban shim biang sa kawei ka sien jam ban pynlong sa ka pakhang surok miet ba lai sngi kynthih, namar ba ka sorkar ka dang kuman.
“Ngi ai khublei ia ki paidbah ba la ai ia ka jingkyrshan ia ka pakhang shnong bad kyntu ba kin iai bteng ban ai ia ka jingkyrshan ha ki jingiakhih ban dang wan”, la ong u samla Frederick haba iakren lyngba ka phun ha kane ka janmiet sngi Nyngkong.
U Vice President ka KSU u la ong ba hadien katei ka lai sngi ka jingpakhang surok miet, ki sengbhalang kin sa shong jingialang biang ban bteng shuh shuh ia ka jingiakhih ha ka jylla ban pyntreikam beit ia ka Inner Liner Permit (ILP) ha kane ka jylla.
Ki shiphew seng kynthup ka KSU, FKJGP, HNYF, CSWO, GSU, JSU, KWWDA, ADE, RBYF, AJYWO ba la kyrshan da kiba bun kiwei ki sengbhalang ki la dep khot ia ka pakhang shnong ha ka sngi Nyngkong bad ka long kaba jop.