Sa ka Nongsder, ka bym don nongleit bar pathar

Nongpoh, 30 Nailur:
Katba nangmih ki sngi ka Ri Bhoi District, ka la nangjan nangjan sha ka thong jong ka Swaatch Bharat Mission, ha kaba bun tylli ki shnong hapoh jong ka Distrik ki la ioh ban pdiang ia ka nam (Open Defecation Free) ne kum ki shnong kiba la lait na ka jingleit painkhana pathar.
Ia kane la sakhi mynta ka sngi haba ka Dorbar Shnong Nongsder, ka shnong kaba la ioh ia ka nam kum ka shnong kaba la lait na ka jingleit shabar pathar, ha ryngkat ka jingiatreilang bad ka Swatchh Bharat Mission, Ri Bhoi District, ki la pynlong ia ka Social Awareness Gathering on Sanitation, Hygiene and Cleanliness, ha Madan shnong Nongsder, kaba long ruh kum shibynta ban pynshai paidbah halor ka jingdonkam jong ka jinglehkhuid ha kine ki sngi.
Ha kane ka sngi ka Kong D. Phawa, ADC ka Ri Bhoi, ka la long kum ka kongsan, ha ryngkat u Bah P. Khonglah BDO ka Umsning Block, u Bah W. Shangpliang Rangbah Shnong Nongsder, u Bah O.B Rani, u Bah Jonas Lyndem, ki riew rangbah ba kynthup ia ki paid nongshong shnong bad ki khynnah shul ka Bethany Secondary School Nongsder.
Ka Kong D. Phawa, haba kren kum ka kongsan ha kane ka sngi, ka la pynpaw ia ka jingkmen haba ka iohi ka jingkiew jong ka jinglehkhuid hapoh jong ka Distrik bad kane ka long ruh tang namar ba ki paid nongshong ha kine ki sngi ki la sngewthuh ia ka jingkordor jong ka jinglehkhid.
Kumta na ka liang ka Kong D. Phawa, ka la kyntu ia ki paidbah nongshong ka Nongsder ba kin iaibteng ia kane ka jinglehkhuid, namar lada lah ban pynkhuid ia ki shnong ki thaw bad ban lait na ka jingleit shabar pathar, ka na pyllait ruh ia ki nongshong shnong na kiba bun ki jait jingpang bapher bapher.