Sa ka nongdie sha ha Khyndailad, ka ioh pang khlam covid lem bad 50 ngut kiwei pat

Shillong: U Director ka tnad ka koit ka khiah, u Dr Aman War u iathuh ba mynta ka sngi, ki don 51 ngut ki briew ki ba ioh jingpang Covid.

Na kine, 17 ngut ki dei ha East Khasi Hills District,14 ngut ha West Garo Hills District 19 ngut ha Ri Bhoi District bad uwei ha West Jaintia Hills District.

Haba batai shai ia ki briew kiba la ioh jingpang covid, mynta ka sngi U Dr Aman War u iathuh ba ha East Khasi Hills District 17 ngut kiba la test Covid positive mynta ka sngi ki kynthup ia ki lai ngut na Arm forces, uwei u Traffic Police, 3 ngut ki dei ki nongtrei ha ka tnad ka koit ka khiah,ka wei ka dei ka ba die sha ha Khyndai lad, uwei u dei u ba wan phai na shabar ka jylla bad 7 ngut ki dei ki shipai BSF.

Ha West Garo Hills 14 ngut baroh ki dei ki shipai BSF,West Jaintia Hills u dei u khun jong uwei u ba long positive, ha Ri Bhoi District 19 kiba kynthup ia ki 15 ngut ki Arm forces, 3 ngut kiba wan phai na shabar ka jylla bad uwei na Byrnihat. Haba batai shai shaphang ka briew kaba la test positive kaba die sha ha Khyndai lad, u Dr War u iathuh ba kane ka briew ka la leit ban shim dawai ha Woodland Hospital bad hadien kane ki la phah ban leit ia ka sha Nazareth Hospital bad na Nazareth Hospital ki la leh iaka test ha NEIGRIHMS Hospital bad ki la shem ba ka long Covid Positive.

Katba halor ka jinglong positive jong u pulit Traffic, u Dr War u la iathuh ba une u dei u ba iakynduh ia uwei u pulit na East Jaintia u ba la test Positive bad ki 3 ngut ki nongtrei ka tnad ka koit ka khiah, kiba la test Covid positive mynta ka sngi ki long uwei u dei u nong ai dawai ha Civil Hospital uwei u nongiarap (Wardboy) ha Civil Hospital bad uwei u dei u nongiarap (ward boy ) ha NEIGRIHMS Hospital. Ki briew ki ba don ia kane ka jingpang ha ka jylla baroh kawei, ki long 640 ngut ha East Khasi Hills District 498 kiba kynthup ia ki 194 ngut ki shipai BSF, ki riew paidbah 243 bad ki armforces 61, ha West Khasi Hills District 5 ngut ha Ri Bhoi District 70 ngut, ha West Jaintia Hills District 17 ngut, ha East Jaintia Hills District 17 ngut, ha West Garo Hills District 29 ngut ha South West Garo Hills District 2 ngut bad ha South Garo Hills District 2 ngut.

Ki briew kiba la ioh ia ka jingkoit ba pura ki long 345 ngut kynthup ia ki 6 ngut ki ba la koit mynta ka sngi,ki sample kiba la dep ban phah test ki long 39782, ki ba long negative ki long 38 412 bad ki result kiba dang ap ki long 380 tylli.