Sa ka jing shahthngan ha khmat Secreteriat, yn sdang u bah Ardent, naduh 23 Jymmang

Shillong: U bah Ardent Basaiawmoit, President ka Voice of the People Party (VPP), mynta ka sngi, u la ong ba un sdang ban shong shah thngan ha khmat ka Secretariat, naduh ka 23 tarik mynta u bnai ban iakhih halor ka jingbym seisoh bad ka jingbym batai bha ka sorkar ia ka reservation policy bad ka roster system.

Ia kine ki kyntien u bah Ardent, u la pynsngew sha ki paitbah ha ka jingialang ka ba la long mynta ka sngi ha Additional Secretariat.

U bah Ardent, u la ong ba ka lah dei ka por, ban klet ia ka shuki, hynrei, ban pyrkhat ia ka jingeh jong ki khun samla. “Ka jingialeh mynta kam dei shuh jong ka Voice of the People Party, hynrei ka dei jong ka jaitbynriew hi baroh kawei”.

Kumta u bah Ardent u la wer ia baroh ki khun samla, ki longkmie bad ki longkpa ba kin pyni shisha, ia kaei kaba ki dawa, ba kan long kaba shong hok bad lada ki shah jem ha kane ka kynti, ba mynta kan long ka jingduhnong kaba khraw ia ki khun samla jongngi.

U bah Ardent, ula ong ba na ka liang ka party ka ieng skhem ha ka nongrim ba kam shym la pyrshah ia ka Roster System, hynrei ka pyrshah ia ka jingnoh shiliang ka Reservation Policy, kaba la pyntreikam mynta la 51 snem tam.

U ong ruh ba mynta la sdang mih ki khubor hamsaia ba ki Garo ruh ki lah mut ban mih iakhih, hynrei u bah Ardent u la ong ba ki khlem iakhih ban ong ban pynduh kam noh ia ki jaitbynriew Garo, hynrei ki dawa ban pynbeit ia ka jingthungkam thungjam hapoh ka jylla bad ba ka dei ban long katkum ka jingdon pait, la bynrap u bah Ardent.