Bah RM Shabong
Ki Waheh Shnong jong ka East Jaintia Hills, ki la mih paidbah mynta ka sngi, ban khanglad ia ka jing wan kit dewiong na Assam, ban leit theh pynshlei mam sha ki karkhana shna dew bilat ha East Jaintia hills.
Sngew sangsot ia ki Waheh Shnong ba pli, ba ki don ha kat kane ka khim khait bad kata ka long, ba ha kine ki sngi, imat ki la kylla long ki kynja chowkidar lane ki sangot khlem bai nong bad kata ka long ba haba jia ka khlam covid, ki ia bunkam ban leit pyn sngewthuh paidbah kylleng kylleng bad ha la ka jinglong riew paidbah, hynrei ki hap leh nang leh stad ban batai shaphang ka jingpang, ban kit khlieh ia ka sam khaw, sam doh, sam bam sam dih, ban khang ia kiba rung ba mih pathar bad ka jing kitkhlieh kaba eh than.
Katba ki dang ia khun tyngeh ia kitei ki jingeh, kiba mih na ka khlam Covid-19, mynta pat ka mih sa kawei ka jingeh bad kata ka long ba ki hap ban khanglad sa ia ki trok kiba leit theh dewiong buk buk sha ki karkhana ha Jaintia Hills. Sangsot kiba pli!!
Ha kat kane ka saw ka sian, ngi lyngngoh ba kumno ki nong mihkhmat mih khmut jong katei ka thain lem bad ka sorkar Jylla, ba kim sngew lehrain ban shu pyni jawdud ia kiba pli ki trai shnong ka Jaintia Hills, ba kin tuid da ki phew tylli ki trok dewiong, katba ia u dewiong lajong pat, uba la shlei lut ia ki lum ki wah, ba kim lah ban pyndonkam satia. Ani kaba da sngew kordit tasam.
Ngi sngewthuh ba ka don ka ain kaba khang ban ia die ia thied ia u dewiong jong katei ka thain ia mynta; kumta, lada ka ain jong ka Supreme Court, ka khang ban die dewiong, te balei pat ba kam don sa ka ain jong ka sorkar Jylla, kaba khang sbak ia ki kompeni dew bilat ba kin trei kam. Lane ba ka long pynban, ba ka sorkar Jylla, ka kham niewkor ia ki kompeni dewbilat, ban ia u paid ka Jaintia Hills? Ka jing iakhih jong ki Waheh Shnong ka Jaintia Hills, ka la dei namarkata ba ka sorkar Jylla, kan pyrkhat khia, la ka kham donkam ia ki mahajon dewiong na Assam lane ki kompeni dewbilat ne ka kham donkam ia ki Waheh Shnong, na la ka jong ka Ri bad lada ha kat kane ka saw ka sian, ka sorkar Jylla, kam pat sngew dei ban ai khublei ia ka jing duh thiah duh dem ki trai shnong, ki trai Jylla, kumta kan eh than ban wad ha ka dikshoneri ia ka ktien ieid Ri, jong ka kane ka sorkar MDA.
Phi don ban ong eiei?