Sa ar taiew yn phah ki sengbhalang ia ki mat jingdawa sha ka sorkar halor ka ILP

Shillong, 17 Rymphang:
Ki 13 tylli ki seng bhalang ba iakhih ban dawa pyntreikam ia ka ILP kin sa phah ia ka jingthoh sha ka sorkar hadien ka ar taiew ban aiti ia ki lad kumno ban khang lad ia ki jingwan rung beain ki briew nabar sha kane ka jylla.
“Ngi la don ki plan halor kumno ban tehlakam ia ka jingwan rung ki briew nabar ha kane ka jylla, ngin sa aiti ia kine ki mat sha ka sorkar ha kine ki ar taiew ban wan”, la ong u general secretary ka HNYF u Bah Sadon K Blah.
“Ia mynta, ngi kwah ban pynleit jingmut ha ka kam jong ngi, ngin sa ai jubab ha ka por kaba biang sha ka sorkar halor ki mat jingdawa jong ngi”, u la ong.
Ha ki 22 tylli ki mat jong ki sengbhalang, ka sorkar ka la ong ba ka jingpyntreikam ia ka ILP kan wanrah ia ka khubor kaba bym iahap lada yn pyntreikam namar ba ka khang lad ia ki kam pynroi.
Halor ki 52 tylli ki Act na ka jylla, u Bah Blah u la ong ba haduh mynta ki la ioh 20 tylli ki ain.
“Ngin aiti ia ki jingdawa jong ngi wat khlem pule ruh ia ki 52 tylli ki ain. Kam long kaba donkam ban pule ia ki. Ngi la ioh pdiang ia baroh kiba donkam”, la ong u general secretary ka HNYF.