Sa 73 ngut kiba ioh pang covid 19 ha Assam, 30 ngut kiba na Kuwait

Guwahati: Sa 73 ngut ki don kiba ioh pang COVID19 ha Assam bad baroh ki la poi mynta sha ka 1,463 ngut.

U Himanta Biswa Sarma, myntri ka koit ka khiah ka Assam, u thoh ha ka tweet jongu, ha ka por 9.06 baje mynmiet ka miet, ba ki don 30 ngut kiba dang shu wan phai da ka liengsuin na Kuwait, kiba ioh ia katei ka jingpang khlam. Kiwei pat ki dei na Cachar, Karimganj, Hailakandi, Kamrup, Kokrajhar, Barpeta, Nagaon bad Jorhat district. La iathuh ba 23 ngut ki dei na Barak valley, 12 ngut na Cachar District, 9 na Karimganj bad 2 na Hailakandi district.Nangta sa 10 ngut na Kamrup, 7 na Kokrajhar, iwei na Barpeta, Nagaon bad Jorhat District.