Sa 7 tylli ki ain, yn phah ka sorkar sha ki sengbhalang halor ka ILP

Shillong, 7 Rymphang:
Ka sorkar Meghala ya kan phah shuh sa hynniew tylli ki ain sha ki sengbhalang ban phah pule kiba iadei bad ka Inner Line Permit (ILP). Kine ki ain kin long nalor ki 52 tylli ki ba la dep phah kham mynshwa ba la long ha ka jingiakren bad ki nongialam.
Hadien ba la dep pule, ka sorkar kan sa khot iakren biang bad ki sengbhalang. U heh sor kar na ka Political department u la ong ba kine ki dei ki ain kiba iadei bad ka jingwanrung jong ki briew nabar sha kane ka jylla.
Ia kine ki ain, la phah myna ka sngi Thoh dieng sha ki nongialam jong ki sengbhalang kiba pynlong ia ka jingiakhih ban dawa ia ka ILP ha kine ki bnai ba la dep.
La iathuh ba ki sengbhalang kim shym la buh kano kano ka por ia ka sorkar ba kan phah.
Ha kine ki bnai ba la dep, ki sengbhalang 13 tylli ha ka jylla, ki la pynlong ia ki jingiakhih bapher bapher ban dawa pyntreikam ia ka ILP ha kane ka jylla khnang ban tehlakam ia ka jingwan rung ki briew ba nabar.
Hynrei hadien ba la iakren bad ka sorkar, ki la pynlong ia ki ban sangeh shwa ia ka jingiakhih ban pule ia ki 52 tylli ki ain kiba ka sorkar ka la ai ha ki sengbhalang kiba iadei bad ka jingwan rung jong ki briew nabar sha kane ka jylla bad hadien ba ki la dep pule, kin sa wan iakren biang bad ka sorkar.