Sa 6 bnai, pynjlan ka sorkar jylla ia ka Pawan Hans

Shillong, 05 Rymphang:   Ka sorkar jylla mynta ka sngi ka la pynjlan biang ia ka jingshakri jong ka kompeni pyniaid helicopter Pawan Hans sa hynriew bnai ha kane ka jylla. Ia kane ka rai la shim da ka kynhun myntri (cabinet) kaba la shong jingialang mynta ka sngi.
“Ka jylla Meghalaya ka dei kaba nyngkong duh ban ioh ia ka helicopter ban pyntreikam da kane ka kompeni kaba la pynbiang ia ka jingshngain ia ki nongleit nongwan”, la ong u Myntri Rangbah jylla u Mukul Sangma.
U la ong ba ka sorkar ka la shim ia kane ka rai, hadien ba ka la sngew biang ia ka jingshakri kane ka kompeni ban pyniaid helicopter na Shillong, sha Guwahati, Tura ban shakri ia ki nongleit nongwan.
Ka sorkar pdeng na ka tnad Ministry of Home Affairs (MHA) ka bei pisa haduh 75 percent ia ka jinglut jingsep bad kaba sah, hap buria ka sorkar jylla. “Ka sorkar pdeng ka la kyrshan bha ia ka jingdonkam ha kane ka liang bad ka sorkar ka la sngew dei ban pynjlan shuh shuh ia ka jingiateh bad kane ka kompeni sa hynriew bnai”, la ong u Myntri Rangbah.
U Myntri Rangbah u la iathuh ba ka kompeni Pawan Hans, ka don ka dolphin bad lai tylli ki helicopter ban kit ia ki nongleit nongwan jong ki briew kane ka jylla.
Kham mynshwa, ka sorkar jylla ka la pynsangeh noh ia ka jingiateh bad kane ka kompeni Pawan Hans, hadien ba la mih ka jingsngew syier na ki paidbah ka jylla, ia ka jingbym sngew shngain ia ka jingshakri jong kane ka kompeni ia ki paidbah.