Sa 48 kynta, la pynjlan ia ka jingkhang internet ha ka Jylla

Shillong: Ka jingkhang ia ka internet, ha ka Jylla, la nang pynjlan shuh shuh sa 48 kynta, ong ka khubor sorkar.

La khang ia ka internet ha ka 12tarik mynta u bnai bad ka la dei ban kut hynnin ka sngi Saitjain, hynrei lyngba kane ka jing pynjlan kaba thymmai, la khmih lynti ba kan kut ha ka janmiet jong ka Lah Sngi U Blei, lada jia ba ka sorkar kam pynjlan shuh shuh.

Lyngba kane ka jing pynjlan, ka jing khang internet, ka la iaid la 96 kynta ha ka jylla baroh kawei, na ka jing iakhih pyrshah CAA jong ki kynhun bapher ha ka nongbah Shillong.