Sa 16 tylli ki projek pynmih bording, pynkhreh ka sorkar jylla

Shillong: U myntri rangbah ka jylla u Conrad K. Sangma myn hynnin ka sngi u la ong ba ka sorkar Meghalaya ka dang thmu ban tei sa kumba 16 tylli ki projek pynmih bording hapoh ka jylla.

U la ong ba ka jylla Meghalaya haduh mynta ka don tang 2 tylli ki dam pynmih bording ba pura ka jylla kata ka Umiam Hydro Projek bad ka Leksha Hydro Projek.
“Wat la ka jylla ka don tang kumba 4 lak ei ei kiba pyndonkam bording bunsien ka jylla ka hap ban thied bording na ki ‘Agency’ kum ka NEEPCO bad na ka NTPC namar ka jing duna palat ka jing pynmih bording ka jylla” u la bynrap.
U myntri rangbah ka jylla u la ong ba lyngba kine ki 16 tylli ki ‘Hydro Thermal Projek’ ka jylla Meghalaya ka lah ban pynmih haduh 1600 MW bording na ka bynta ban pyndonkam hapoh ka jylla. U Conrad K Sangma u la ong ruh ba ka jing slem ban tei ia kine ki ‘Hydro Thermal Projek’ kadei namar ka sorkar Meghalaya ka shem jing jynjar palat ban ioh ia ki jaka na ki paidbah.
U la ong ruh ba ka jing sahkut ban tei ia bun ki ‘Hydro Thermal Projek’ ban pynmih bording hapoh ka jylla kum ia ka ‘Kynshi Hydro Projek’ namar ka jing don jong ki maw ‘uranium’ kiba la pynlong ia ka sorkar ban sangeh noh syndon.