Ryngkat ki plakad mihki samla NEHU ha ka sngi sam syrnot

Shillong, 28 Iaiong:
Ki samla pule ka skulbah North Eastern Hills University hapoh ka lama ka North Eastern Hills University Students Union (NEHUSU) ki la pynlong ia ka jingiakhih pyrshah ba kynsan ia ki bor pyniaid ka NEHU da kaba kynnoh ba kim shym la leh eiei ia ki mat jingdawa ba ki la iakren la kham slem.
Ki samla pule ki la pynlong ia ka jingiakhih kynsan mynta kaba dei ruh ka sngi pynlong ia ka jingsam syrnot sha ki samla ba pyndep ha ki jingkyrdan jingpule bapher bapher ba la wan u dkhot ka NITI Aayog u Dr Vijay Kumar Saraswat kum u kongsan.
Kine ki samla kiba ialum ha phyllaw ka NEHU ki la rah plakad ryngkat ki jingthoh pynrem pyrshah ia ki bor pyniaid kane ka skulbah.
Ki mat jingdawa jong ki samla pule ki kynthup ban ai syrnot noh hapoh ar bnai hadien ba la pynmih ia ka result, ban pynjynsur ia ka por ban shong ha Library khamtam ha ki por ba jan bad por long eksamin.
U Vice Chancellor u Prof SK Srivastava, u Pro-Vice Chancellor u Prof Henry Lamin bad kiwei ki la shah pynwit ha ki samla pule ba pynlong ia ka jingiakhih kynsan kynsan.
Ki la dawa ba ka bor pyniaid NEHU ka dei ban pynbiang ia ki bos ban leit on leit shaw da kaba shim wai na ki riew shimet haduh ba kin da ioh ia ka bos lajong. Ki la dawa ruh ban wai ia ki hostel jong ki riew shimet shabar ka kampos haduh ban da dep shna ia ka hostel.
Ki la dawa ruh ba dei ban thung dkhot ia ki doktor ha ka Health Managing Committee, ban thung dkhot ruh lai ngut na ki dkhot ka kynhun ki samla pule ha ka Academic Council.
Kiwei pat ki jingdawa jong ki samla pule ki long ban buh ia ka CSIR NET Centre ha NEHU, ban pynneh ia ka jingkhuid ha kampos nalor kiwei.
Ha ka liang ka jingialehkai, ki la dawa ruh ban tap ia ka jaka ialehkai basketball, ban pynjynsur ia ka por ia kiba kwah ban leit kilanmet ha Gym bad ha ki madan ialehkai.
Halor kane ka jingdawa jong ki samla pule, u Vice Chacellor u Prof. Srivastava u la khot iakren ia ki samla pule ha ka por 4 janmiet.
Ha kawei ka liang, mynta ka sngi kumba 9 hajar ki samla pule ka North Eastern Hills University ki la ioh syrnot kyrdan bapher bapher na kane ka skulbah. Kane ka jingsam syrnot ia kiba pyndep ha ki kyran bapher bapher la pynlong, ka dei kaba 24 jong ka NEHU. Na ki 9 hajar, 128 ngut ki la pyndep ia ka kyrdan Ph.D, 47 ngut ha ka MPhil, 839 ha ka Post Graduate Degrees bad 7975 ngut ha ka Bachelor’s Degree.