Shillong: Ki paidbah ki la tuid sha ka jing ialang jong ka parti Meghalaya Trinamool Congress (TMC) kaba la pyn long ha madan Iew rynghep, Shillong. Ha ka jingialang ba la tip kum ka “Townhall with Dr Mukul in conversation with the youth of Meghalaya”, u Dr Mukul Sangma ula ai jingkren sha ki samla pule, ki nongtrei kam lajong, ki nongrwai, ki nongialehkai ha ki jait jingialehkai bapher.
Hadien ka jingiakren bad ka kynhun ki longkmie, u Mukul ula ioh ban bteng ia ka bynta ba-ar ban ia kren bad ki khun samla halor ki mat ba ktah bha ia ki samla ha ka ioh kam ioh jam bad ki jinghiar arsut jong ka pule ka dngle ha ka jylla.
Haba ai jubab ia ka jingkylli ba la buh halor ka jinghiar bha ka ioh kam ioh jam ha ka jylla, u nongialam jong ka liang pyrshah ula ong ba ka sorkar ba mynta ka la pheil lut ha baroh ki liang haba iadei bad ka jingaikam ai jam ia ki khun samla. “Phi la iohi ba bun tylli ki kam ba lait hynrei ka sorkar ka khlem lah satia ban thung kam ia ki khun samla. Ka jingaikam ai jam ka dei ka jingphohsniew jong kiba bun balang khamtam ba ki kmie ki kpa ki la pynlut bun bha ka pisa na ka bynta ki khun ban pynnang pynstad. Na ka liang jong ngi, ngi la pyrshang la bunsien ban ioh jubab na ka sorkar halor kane ka bynta hynrei ka jingpyrshang ka shu long lehnohei na ka jingkyllut shkor jong kiba don ha ka sorkar”, la ong u Dr Mukul.
Haba ai jubab ia kawei pat ka jingkyllut ba iadei bad ka jing pheil jong ka sorkar MDA ba la ialam da ka NPP, u Mukul ula ong ba ka don ar bynta ka jingpheil jong ka sorkar ba mynta: kawei na kita ka dei ba ka sorkar ka hap ban shim ia ka jingkit-khlieh bad kawei pat ka dei ban pyndep ia la ka kamram. “Ki lah ban don ha ka bor, hato ki don pat ka jingpyrkhat ban kit khlieh? Ngi dei ki nongmihkhmat na bynta jong ki paidbah. Ka kamram ba nyngkong ka jong ngi ka dei beit ia u paidbah. Lada ki paidbah kim sngew shngain bad long shngain ban shong ban sah ha ka jylla, ka sorkar ka hap ban kit khlieh. Ka sorkar ba mynta ka la pheil haba iadei bad u paidbah jong ka jylla”, la bynrap biang u Dr Mukul.
Ha kane ka jingialang lah iohi ruh ia ki samla kiba la pyni la ki sap ki phong ha ki beat-box bad u Mukul ruh ula tem ia ka guitar bad rwai katto katne ki jingrwai.
Da ka jingdon jong ki paidbah ka prokram ka long kaba jop, kaba la pynlong ia ki bor pyniaid jong ka parti ban pynlong shuh shuh ha ki bun tylli ki jaka kum ia kine ki prokram ha ki ba bun ki bynta jong ka rilum Khasi bad Garo khnang ban lah ban pynurlong ia ka jingthmu jong ka parti TMC na ka bynta u paidbah jong ka jylla.
Dr mukul sangma garo … down down👎👎👎