Shillong: Ka Smit bad ka Mawpat ki la rung sha ka semi phainal ka Assam Rifles Invitational Football Cup hadien ba ki la jop ha ki jingiakhun kaba long mynhynnin ka sngi ba long ha madan Jawaharlal Nehru Stadium Shillong.
Ka Smit ka la pylliem ia ka Lawsohtun da 2-1 katba ka Mawpat ka la pylliem ia ka Umsning United da 3-2.
Ka Lawsohtun bad ka Smit ki la iakynduh teng mynshem sem ha ka phainal ha kane ka lympung.
Ka Lawsohtun ka la nion tyngeh ha kaba sdang hynrei na ka liang ka Smit ka la khang lad bad dei haduh ban wai ka jingialehkai ka kylla step ba ka Smit lyngba u Andy Mawthoh ka la ioh ban thep.
Shen hadien kane, ka Lawsohtun ka la iakhun tyngeh bad ka la iioh ban pyniahaid ha ka 47 minit da u RaimikiChallam.
Hynrei ha ka 70 minit, ka Smit ka la ioh biang ia ka lad ban thep haduh ban jop syndon khlem lah pynphai shuh ka Lawsohtun.
Ha kawei ka jingialehkai, ka Mawpat ka la pylliem noh ha ka Umsning United. Ka Mawpat ka la ioh ban thep ha ka saw minit da u Defender Pyngrope bad u Tyngshain Marboh ha ka 17 minit.
Ka Umsning Utd ka la ioh ban pynphai da u Oversharp Iawphniaw hadien ba la iaid ka kyllastep. Uwei u nongialehkai ka Mawpat u Kenstar Khonglam u la shah beh na madan bad kane kala pynkhlain ia ka Umsning haduh ba ka la ioh biang ban thep da u Kit Nonglait ha ka 54 minit hynrei ka Mawpat ka la lah ban knieh nam tam ha ka 79 minit da u Tyngshain Marboh.
Lashai ka jingialehkai kan long hapdeng ka Kith United ia ka Mawngap, katba ka Assam Rifles Laitkor pyrshah ia ka Ryntih.