Rung Semi-final ka Kharumnuid FC bad Laitlum FC ha Sohryngkham

Shillong:Ka IInd Mawutieng Invitation Football Tournament ba la pyniaid da ka Mawutieng Sports and Cultural Club ha madan Thohlyndit, Sohryngkham ka la nangjam shaphrang ha kaba ka Kharumnuid FC bad ka Laitlum FC ki la khur ia ka jingjop.
Ha ka jingialehkai ba nyngkong ka kynhun ialehkai Kharumnuid FC ka la pynliem ia ka Riwar United FC. Haba phai sha ka jingialehkai kaba la long hapdeng kitei ki ar tylli ki kynhun kala long shisha kaba iakhaid bha wat la baroh arliang ki players ki la lah ban pyni ia la ki jong ki sap ban iohrah ia ka thong. Tad haduh ba kut ka kylla step ki la iakhaid da mar shi kol. Haba bteng ia ka kylla miet ki la pyrshang tyngeh ban ioh thep kol biang hynrei kim shym la lah ban pynurlong. Kumta lah rah noh sha ka tie-breaker ha kaba ka Kharumnuid FC ka lah khur ia ka jingjop da 4-3 kol. Ha ka jingialehkai ba-ar ka kynhun ialehkai Laitlum FC ka la pynliem da 2-0 kol ia ka Dream Clippers. Ia kitei ki kol lah ioh ban thep da u Wanlambor Kharkongor ha ka 21 minit bad u Pyntngenlang Kharumnuid ha ka 67 minit.
Na ka liang ka synjuk ka pyntip ba kan pynialehkai ia ka 1st Semi-final ha ka 4th Jymmang, 2019. Ha kane ka sngi ka King XI (Smit) kan iakhun pyrshah ia ka Young Star FC (Shillong) ha ka por 2.00 baje janmiet.
Ka synjuk ka khot ka wer ia baroh ki riew ieit phutbol ban ia wan ban sakhi da la ki jong ki khmat ia kine ki jingialehkai. Ka bai rung na ka bynta ki nongpeitkai ka long tang 30 tyngka marwei.