Nongpoh: Ka Umsning United Sports Academy, kaba dei tang maka ka kynhun ialehkai na Meghalaya, kaba la leit ban iashimbynta ha ka 27th All India Bishnu Jyoti Memorial Football Tournament 2018, kaba la long ha Sonitpur, Tezpur, Assam, ka la rung sha ka Phainal, hadien ba ka la lah ban pynliem noh pyrshah ia ka Rising Athletics United Sports Clubs ka kynhun ialehkai na Manipur.
Ha ka jingiakhun Semi-Final, kaba la long hynnin ka janmiet, ka Umsning United Sports Academy, ka la lah ban pynliem ia katei ka kynhun ialehkai na Manipur haduh 4-1 bad pynlong syndon ia ka kynhun ba kan rung phainal ha katei ka lympung ialehkai, kaba la wan ban iashimbynta da ki kynhun ialehkai bapher bapher kiba don hapoh ka ri.
Ia kitei ki saw kol na ka Umsning, la thep da u Balan Taro, Ronnie Hanse, Humblestar Syiem bad Willington Syiemlieh, katba ia katei ka shikol kaba la pynphai da ka Rising Athletics United S.C la thep da u H. Singh.
Kumta hadien katei ka jingjop, ka Umsning United Sports Academy kan iakhun pyrshah ia ka Morning Star Sports Club kaba dei ka kynhun ialehkai na Karbi Anglong, ka ban sa long ha ka 4 tarik mynta u bnai ha ka por 2 baje nohphaisngi ha katei ka jaka.