Shillong: Ka kynhun ialehkai ka Mizoram ka la rung sha ka phainal ka lympung ialehkai ka Hero Junior National Football Championship jong ka Dr BC Roy Trophy hadien ba ka la pynliem ia ka Meghalaya da 1-0 kol ha ka jingiakhun semifinal mynta ka sngi ha madan JN Stadium, Polo.
Ia ka kol ka jingjop ka Mizoram la thep da u K Lalchhuansanga da ka khlieh na ka bol ka la lait na kti u nongap kol ka Meghalaya u Wanteiland Malngiang ha ka 87 minit.
Ha ka jingiakhun ka Mizoram ka la ialehkai bha ha kaba sdang, hynrei ka Meghalaya ka la lah ban iada haduh ba kut ka kylla step khlem don ba thep kol.
Haba phai ha ka kylla miet, ki rangialehkai ka Mizoram ki la pyrshang borbah ban pynpra ia ka tem shakhmat ban ioh thep kol.
Kumjuh ki khynnah ka Meghalaya ki la iakhun tyngeh ban tur shakhmat bad ka la dei ban ioh thep lyngba u Sangti Janai Shianglong hynrei la ioh noh ban iada.
Hapdeng ka jingiakhun ba iakhaid bha, u Lalchhuansanga na ka Mizoram ula ioh ban pyndei da ka khlieh ia ka bol ban thep ia u nam tam ha ka minit kaba 87.
Ki khynnah ka Meghalaya ki la iakhun borbah ha ki minit ba khaduh ryngkat ka jingpyrta ki nongkyrshan ban pynphai kylla ia katei ka kol, hynrei ki nongap dien ka Mizoram ki la ieng shkem ban iada ia ka kol haduh bakut ki minit ka jingiakhun bad rah syndon ia ka jingjop da 1-0 kol.
Ka Mizoram kan iakhun pyrshah ia ka kynhun ba jop ha ka jingiakhun semifinal ba-ar hapdeng ka Punjab bad West Bengal la shai ka sngi por 1 baje, katba ka jingiakhun final kan long ha ka sngi Palei.
Phi don ban ong eiei?